曾狂呻新劇對白冗長的方中信，昨日開工時灰爆指仍然「嘔泡中」，但被同劇李佳芯踢爆唸對白非常流利，只是謙虛才出此言！文、攝：影視組

方中信（左）、李佳芯和蔣志光攜手拍《律政強人》。

蔣志光獲粉絲探班。

方中信、蔣志光、李佳芯等昨日在中環為劇集《律政強人》開工，曾狂呻劇中對白冗長的方中信，無奈指劇集已拍攝了一陣子，但仍然「嘔緊泡」，坦言該劇佔七成對白均又長又難記，問到倒數可需拍戲中度過？他笑說：「今晚如果唔甩，希望可以收九點幾，跟住返屋企倒數，呢套劇甩好多。（咩事？）導演撚Shot囉！早兩晚郭少芸又冧廠。（新進小花有冇甩對白？）個個都OK，做晒功課先開工，我都正常NG啦！」

談到主演的內地劇《芈月傳》在內地收視不俗，方中信大感高興，日前更剛好睇到他在劇中逝世的場面，問到可有憑劇集效應多了工作？他說：「都係咁啦！受唔受歡迎都好，播出嗰段時間囉！依家都月尾，都冇辦法，唔緊要啦！係你就係你！」

否認Head住黃智雯

而李佳芯得知方中信拍到「嘔泡」時笑說：「佢武功底子咁厚喎，如果佢嘔泡，我咪要嘔血？佢成日話自己冇記性，但入到廠最流利講對白係佢，所以係佢謙虛啫！」有指她力壓同劇的黃智雯任「女一」，佳芯說：「冇乜話Head邊個，套劇大家戲份都好平均，我同智雯戲入面係好姊妹，成日都同場，私下感情都幾好，之前佢生日開工，我都買生日蛋糕畀佢切。」

蔣志光恨延續《男親女愛》

至於蔣志光被問到《男親女愛》有意開延續篇，當年有份參與該劇的他直言有興趣：「好渴望，但先要解決嘟姐（鄭裕玲）唔捱夜，佢平時十點幾就瞓，好早起身，咁咪要07開廠，下午收工先得。（唔容易打破當年收視50點？）都係，但黃子華係有創意嘅人，應該會有Idea加入去，作為觀眾都好期望。」