最新一期《好報》披露近期極速上位的吳業坤鮮為人知的過去，公屋出身的他生長在單親家庭，在沒有「父幹」下靠自己打拚。近日坤坤人氣急升，更有意今年越級挑戰，殺入紅館開個唱，新一年坤坤目標多多，望一圓90後上車夢，買樓報答身兼父職的母親！採：音樂組 文：專案組 攝：追蹤組

多咗人關注的吳業坤不介意被人知道住公屋。

吳業坤接受《好報》訪問時表示希望能買樓報答母親。

吳業坤與友人在大牌檔醫肚。

吳業坤早前在《勁歌金曲頒獎典禮》獲新人金獎時爆喊至眼鏡起霧，「一喊成名」下即被新一期《好報》披露他已一躍成為「公屋歌神」。走勢凌厲的坤坤，於2016年更會越級挑戰殺入紅館開騷。

唱別人的歌好聽

星娛樂唱片公司總經理Tommy Chu坦言會為坤坤籌備開騷，更會將所有資源投放在坤坤身上：「佢個勢依家咁勁一定會開個人演唱會，可能喺九展或者伊館，如果喺九展個場都有三千人。（會唔會上紅館呀？）佢個勢如果Keep住咁好都唔排除越級挑戰！對佢有信心，有大食大，希望買大博起孖，所有資源都會投放喺佢度！（佢夠歌咩？）你哋上網聽吓佢唱人哋啲歌，林憶蓮嗰首《願》真係好好聽！」

會盡300%努力

坤坤得知有機會到紅館開騷的消息時亦受寵若驚，他接受電話訪問時說：「嘩！嚇死囉！不過公司有信心我都有信心，會盡300%努力做到最好！（Tommy話想買你大博起孖喎！）都唔會太大壓力嘅，做人要有目標，最緊要公司支持！（你夠歌？）所以依家努力儲多啲好歌！」而他更憑歌曲《原來她不夠愛我》入圍於今晚舉行的《叱咤樂壇流行榜頒獎典禮》「我最喜愛的歌曲」最後五強，他昨日出席倒數音樂會活動時坦言感驚喜：「有人聽已經好開心，完全冇諗過入圍五強，事實證明做歌手唔一定要靠包裝。」

大牌檔醫肚識慳

他又謂不介意被人知住公屋，更希望今年能買樓：「依家屋企得三百幾呎，想買間屋有三間房，咩地區都冇所謂。媽咪做家務助理，一星期開兩、三日工，唔係辛苦但都想佢快啲享福，個妹讀緊大學。（靚女？）好似我咁樣，靚唔靚見仁見智啦！（係咪話老竇唔生性？）我同佢只係少聯絡，唔係十冤九仇。（買樓預埋龔嘉欣？）留間工人房畀佢！」捱出頭爆紅的坤坤，為圓夢買樓仍然慳得就慳，連日來被本報拍得醫肚都選擇在大坑或居住的樂富，平民大牌檔或茶餐廳，知足的他亦食得開心，悠然自得。

至於緋聞女友龔嘉欣早前表示，有想過與吳業坤夾份開果汁店，坤坤更說「畀晒啲錢佢管」，問他何出此言時，他說：「因為我對數字唔敏感，佢呢方面叻啲，所以我信佢。（真係夾份開果汁店？）只係設想，我都想有其他發展，好似創業咁。」問到是否因擔心阻礙事業而「焗認」嘉欣為「家姐」，他說：「唔可以咁講，認佢係家姐因為佢真係好似我家姐咁，好照顧我。（係知己？）總之係家姐。」