從事影視工作37年的鄺佐輝自無綫藝訓班畢業後，便與不少台前幕後結緣，並成為好友。一眾藝人得悉他病逝的噩耗後紛紛表示惋惜。

鄧英敏

上星期探佢時佢昏迷緊，之前佢係飲嗎啡止痛，但後期已飲唔到，要打嗎啡針嚟止痛。我同佢呢一、兩年接觸最多，我哋鍾意一齊夾Band，佢係業餘歌手，但有職業水準，佢飲歌係《一點燭光》、《天籟》。我同廖安麗有幫手製作佢抗癌過程DVD，叫啲朋友去講番同鄺佐輝嘅相處軼事。其實佢三個女都出咗嚟做嘢，已經冇牽掛。佢生前已簽捐贈器官卡，可以按情況捐畀有需要嘅人，相信佢家人會支持。

姚子羚

初入行時同佢拍劇，我哋飾演一對父女，之後我就以「阿爹」稱呼佢，之前有同事喺社交網叫大家拍條片畀佢，我第一時間拍咗，不過唔知佢睇唔睇到，之前知佢病咗，但冇去探佢，驚打擾佢，可以的話都會送佢最後一程，佢都係我人生其中一個好重要嘅前輩。」

吳沅儀

兩星期前探過佢，嗰陣面色差同攰，但佢堅持畀個開心樣我哋見，送我哋走時佢仲話要送到出門口，仲講聖誕快樂，我擰轉面望佢個神情，好似有預感係講永別咁。我好多謝佢，十幾年前我個仔想入一間小學，曾經要佢幫手，佢義不容辭答應。

譚玉瑛

佢係第七期訓練班，我係第九期，兩星期前探過佢，當時情況幾好，但星期四再去已經昏迷狀態，冇得清醒見面傾偈，我同佢個女影咗啲相，諗住畀佢睇番知我嚟過，聽到佢病逝覺得好可惜，解脫咗痛楚，知佢係天主教徒，陳日君都有探過佢。中國人俗語冬大過年，聽日做冬，最後都過唔到。