龔嘉欣陽光閃退改認姊弟
「一隻囚禁的鳥」吳業坤去年台慶只化身一隻冇對白的「吳業棋」靠邊站，惟前晚終揚威《勁歌金曲頒獎禮》，首奪新人金獎的他站在台中央大唱《陽光點的歌》， 更喊到眼鏡起霧似「打邊爐」，成為網民熱話！事業起飛之餘，緋聞女友龔嘉欣亦在微博「示愛」：「我願意成為你的陽光！」「吳業棋」即隔空傳情：「佢開名我咪認囉！」但吳業坤一喊成名，令嘉欣BB難抵其粉絲壓力而急改口風：「我哋係好Close嘅姊弟關係！」
龔嘉欣昨日將吳業坤「降呢」為弟弟，但就直言兩人好Close！
苦等五年終捱出頭的吳業坤，演唱時喊到眼鏡起霧，場面爆笑。
前緋聞女友Aka見吳業坤攞獎即忍唔住喊。
吳業坤五年前以《超級巨聲2》第五名身份入行，眼見同期參賽者甚至後輩都紛紛出碟，戴上歌手光環，自己卻苦無出碟機會，去年還在台慶化身全無對白的「吳業棋」，扮小丑娛樂大家，隨即被萬千網民恥笑，當時他亦自嘲是「一隻囚禁的鳥」，令人心酸！
惟吳業坤五年來從未放棄，珍惜每個演出機會，前晚更成功站上當年扮棋的舞台正中央，以吳業坤之名勇奪新人金獎，難怪他激動得喊到眼鏡起霧矇查查，連前緋聞女友、組合Super Girls成員Aka都喊埋一份，全場無不動容！吳業坤攞獎爆喊一幕旋即成為網民「P圖」對象，瘋狂喪改，掀起全城熱話！早在他得獎前，現任緋聞女友龔嘉欣已在微博貼圖並意有所指：「希望每個人也能找到屬於自己的陽光，我願意成為你的陽光。」事有湊巧！吳業坤在台上獻唱《陽光點的歌》時失控狂喊，其後受訪回應「陽光」時亦揚言：「佢開名我咪認囉！」戀情浮到出晒面。
難抵粉絲人身攻擊
不過，「棋子」一夜變「王子」，似乎令「女神」龔嘉欣感到壓力！她昨日到電視城拍攝《愛‧回家2》，提到吳業坤表示「開名就認」時說：「佢話係咩咪咩囉！我都係想畀粉絲睇，想畀正能量大家，自從同佢傳緋聞開始就不斷受佢粉絲人身攻擊，有時都睇到喊，覺得好煩，佢依家紅喇！覺得我好似黐住佢咁，其實套劇都拍咗咁耐，唔係因為佢紅先同佢做朋友囉！」問到對方有否安慰？她說：「都有嘅，佢都同我講網上面嘅嘢有好壞，做好自己就得！」問到日後會否有所避忌？她說：「諗緊，我都唔知，但如果因為咁要避忌就好可惜囉！」而問到兩人是甚麼關係？她說：「到呢一刻，我哋係好Close嘅姊弟。」
「家姐係一個好好嘅女仔」
吳業坤隨後亦抵達拍攝現場，被問到有否安慰嘉欣時說：「佢做咩唔開心呀？（畀你啲粉絲鬧！）呢個世界唔係正就反！但我都覺得唔應該咁去話一個人嘅。」問到與嘉欣的關係時，他說：「家姐（龔嘉欣）係一個好好嘅女仔！」在旁的嘉欣即一臉受落，吳業坤續說：「我拎獎時佢都有第一時間恭喜我，但我冇即刻覆佢！」另外，走勢凌厲的吳業坤將以新人姿態越級挑機，於元旦衝擊「叱咤我最喜愛歌曲獎」，與一眾天王天后爭獎！
採：音樂組、影視組
文：專案組
