謝霆鋒昨日現身有份投資的曲奇店，招待粉絲試食由他研製的曲奇，又跟粉絲大玩自拍，化身親民廚神，冧暈一眾女粉絲。文：名人組

霆鋒主動拿起手機自拍，氹得粉絲相當開心！

除了請粉絲食曲奇外，霆鋒亦親自試食，實行有福同享。

離開曲奇店時，霆鋒與在外圍觀多時的粉絲親切合照。

霆鋒與Derek（右）一同現身曲奇店向粉絲進行民意調查。

謝霆鋒早前與朋友楊鼎立（Derek）合資經營「鋒味曲奇」，做得有聲有色！昨日霆鋒與Derek現身位於太古城中心的曲奇店，現場還有約12名粉絲在店內試食，店外更吸引了逾30名途人圍觀及拍照，場面熱鬧！

合照簽名乜都得

化身廚神的霆鋒向粉絲詳細講解曲奇的味道、特色及成分等，他又讓粉絲逐一試食曲奇，並即場做民意調查，粉絲對曲奇讚不絕口，試食後更即時購買。向來Cool爆的霆鋒全程友善親民，跟粉絲有講有笑，當有粉絲欲拿起手機跟他自拍時，他竟主動拿過手機玩自拍，令粉絲驚喜萬分！其後他逐一跟粉絲合照，還在曲奇盒上簽名。離開時，店外有巿民要求與他合照，他同樣有求必應！

問到為何現身曲奇店？霆鋒表示與Derek經常為曲奇的味道有拗撬，故他提議做民意調查：「咁耐以嚟我都未問過大家鍾意嘅口味，今日畀大家試食，遲啲開埋廠房畀大家試。（啲曲奇係你研製嘅？）大部分係，都有師傅幫手，全部食譜都係我諗嘅，我晚晚都諗，晚晚都試食。」

諗定新年出咩味

他透露還買了其他品牌的曲奇混合自家曲奇給粉絲試食，最後果然如他所料，粉絲一致選擇了他的曲奇：「我已經諗好咗新年嘅款式，整曲奇仲要諗得遠過拍戲。（女友王菲有冇試你啲曲奇？）唔講呢啲啦！」