前港姐冠軍陳凱琳（Grace）和張繼聰昨日齊以「好運之星」大使身份，出席跑馬地馬場舉行的《好運1月1賽馬日》記者會。兩人將於明年1月1日到馬場慶新年，Grace自言未試過買馬，但曾跟朋友入馬場欣賞賽事。問到可會一試下注？她說：「要睇吓到時張繼聰點教我玩，但當日應該會好忙。」

Grace和張繼聰將入馬場慶新年，未知會否賭番兩手。

張繼聰憶述今年的1月1日也是以該活動大使身份入馬場，為新一年開個好頭。他當日也有下注，問到可有贏錢？他笑說：「贏咗開心！同埋成年嘅好運。（今年幾好？）係，今年好開心，遇到好多好人、好導演同好戲，可以同我偶像張家輝合作，仲有拍《葉問3》。之前睇《葉問》（電影）點會諗到自己可以演佢徒弟，可以近距離睇甄子丹打，我都要打，同埋開演唱會，今年係大豐收嘅一年。」

此外，Grace透露台慶頒獎禮當晚得獎後，與男友鄭嘉穎消夜慶祝，男友一直鼓勵她不少。張繼聰則稱各得獎者都是實至名歸，他能坐在黃秋生隔兩個位感到很開心。