陳爽與囝囝爭寵Sure Win

索爆人妻兼人母陳爽（Sherry）養尊處優，已甚少在螢幕睹其芳蹤，但仍不時出席活動，保養有道令她外貌和身材猶如逆生長！現年32歲的她坦言人生走到今日，最享受是現時的階段：「人生入面最鍾意依家呢個狀態，由細個讀書已經夢想做媽咪，同埋經營一檔屬於自己嘅生意。」

新手媽咪變成熟

結婚兩年後誕下兒子Adrian，Sherry笑言一切都在掌握之中：「當然過咗二人世界先，BB係上天賜嘅禮物。生B之後覺得自己好多方面都改變咗，個人成熟咗、責任大咗，生活上嘅時間安排亦唔同咗，因為BB要媽咪湊住，而且對人生都有唔同諗法，覺得有小朋友係好神奇嘅事，父母慢慢教育佢令佢有一個好嘅環境成長。之前從來冇諗過呢啲嘢，依家一邊學一邊做，係件好有成就感嘅事！」

談到湊仔經，Sherry笑言仍是新手：「身邊嘅媽咪級朋友畀好多Tips我，自己亦睇好多書同聽教育方面嘅Seminar，都對我好有幫助！我哋對住一個小朋友已無從下手，但做老師對住好大班小朋友都冇問題，而且佢哋又有幾十年經驗，好易講得出點嘅小朋友要點樣教。我唔會做『怪獸家長』，但會畀個平台佢去感受，等佢大個啲我會畀佢試音樂、體育等，睇吓佢鍾意向邊個方向發展，唔會逼佢順住我意思行。培養興趣好重要，我細個學琴好辛苦，理解到如果小朋友有興趣同冇興趣會差好遠，所以會睇佢自己想點！」

偏向做好人

每個家庭中，家長經常分工合作，一個唱紅臉一個唱白臉，但Sherry笑言未與老公劃清界線，並自言偏向做好人：「冇同老公分邊個做好人邊個做衰人，但分咗我負責教普通話，佢負責英文，老爺奶奶負責廣東話，兩文三語同時進行。不過我諗我應該係做好人，自己有好尊重生命嘅想法，唔可以成日覺得小朋友咩都唔知，而好強硬去教佢，係要好似傾偈咁慢慢教，雖然囝囝依家仲好細，但我都會長篇大論同佢講道理。」

不少父母都望子成龍，惟Sherry直言不會「逼得太緊」，只想囝囝能健康快樂地成長：「對佢期望好簡單，開心快樂、健健康康就得！唔需要有好大成就，我只希望佢係善良嘅小朋友。好唔捨得佢大得咁快，每個星期佢都學識好多新嘢，之前覺得啲嘢好神奇嘅眼神又冇咗，我都要適應佢步伐。」問到老公會否呷囝囝醋？Sherry笑指不會，又冧爆甜笑：「佢同我一樣咁錫佢，老公錫我多啲添！平時需要啲咩，我唔使出聲佢已經準備晒，而且佢係一個好細心嘅人，好似我身體每個月有幾日唔舒服，佢會自動波煲湯畀我飲，就算我唔講心情差，佢係睇得出，會等BB瞓咗覺同我講『不如我哋揸車出去食糖水啦！』令我覺得受關心同重視。」

感激宋熙年開解

已為一子之母的Sherry身形仍弗到漏，她大方分享秘訣，認為心理及生理一樣重要：「Mental Health同Physical Health都要留意，我相信每個生完BB嘅媽咪唔多唔少都會有少少Depression（沮喪），可能因為身形變化，又或者覺得唔再係小妹妹，要負好多責任，時間金錢上都有壓力，嗰陣我好幸運屋企同朋友畀咗好多Support我，好似Sarah（宋熙年）同阿璇（朱璇）成日同我傾電話，又嚟探我，令我有一個好好嘅Environment去Calm Down（冷靜），令我知道呢啲係正常，係人生必經階段。過咗呢個心理適應期就真係可以去瘦身，依家科技好發達，自己又好好彩有Sponsor，可以做機同着啲瘦身衣令身材好啲。」

後記：

食花膠靈芝谷奶

瑜伽+游水=瘦身

除了天生麗質加上科技幫助外，Sherry認為要注意飲食及做運動：「我會做高溫瑜伽，對排走虛汗好有用。另外亦會喺屋企玩登山機，又同BB一齊游水。飲食方面就因為本身屋企搞海味生意，經常會接觸呢種中國傳統飲食，餵人奶需要好多Energy，要食好多嘢，我會食好多花膠海參同靈芝，一嚟對人嘅Condition好，二來人奶質量亦更好！」