陳海琪畀保安的走

前晚hmv在銅鑼灣舉行盛大派對，據有份出席的人士透露，由於氣氛高漲，身為公司音樂及藝術總監並有份擔任司儀的陳海琪，疑在活動期間不時杯起杯落，到活動中段已面紅耳赤兼腳步浮浮。愈飲愈High的她之後更開始有所動作，台下台上不斷大叫：「我要見老闆！」而當她返回台下休息、工作人員遞上熱茶時，她一手將茶杯丟掉並掃枱，旁人把枱上物件移走，以免發生意外。

堅稱酒量好被整蠱

據目擊人士稱，陳海琪曾多次見人就推，嚇得旁人紛紛彈開幾丈遠！其後有5至6名男女保安上前「夾」住她離場，雙方發生拉扯，行至（車立）口時她不支倒地，走到大堂更一仆再仆，只見她連直線都行不到，一眾保安合力「的」起她，並截的士推她上車。據指在她登上的士前，有嘉賓聽到保安員在對講機交談指「唔好畀陳海琪搞事」，而陳海琪在「掙扎」期間，大髀一度驚現瘀痕，估計是在「大動作」後弄傷所致。本報記者事後追問現場的保安員陳海琪有否醉酒鬧事，他說：「畀我哋抬走咗啦！」

陳海琪回應本報時堅決否認飲醉酒：「幾日不眠不休請嘉賓搞呢個活動，我似花蝴蝶咁招呼朋友，冇掃玻璃！我同Kevin仔（關楚耀）傾偈時突然有幾個保安行近，仲有兩個男保安『的』起我，我即刻問佢做乜事，仲想Fing甩佢哋，佢哋好無禮同粗暴，對我好侮辱仲整瘀我手臂，我一定會投訴！我一啲都冇醉，當時做緊嘢唔會飲醉，如果斷片就唔會記得嗰陣發生嘅事，我酒量好好，嗰三兩杯白酒濕濕碎，之後仲約人食消夜！可能我得罪人畀人大整蠱，呢件事對我名聲影響好大，要追究一世揪出元兇！」問到老闆胡景昭有否就此事與她溝通，她表示不清楚對方是否在港：「佢唔會為呢啲小事出聲。」

陳海琪疑醉酒鬧事公諸於世，事件在網絡上引起熱議，她的「貓事」及胡言亂語被瘋傳！有在場人士更特地節錄其「十二名句」，指前晚上台的嘉賓都無一倖免被她拿來開玩笑，例如向老闆胡景昭瘋狂追問「你係咪白武士」及「關楚耀點解你咁似張國榮」等，關楚耀指昨晨才得悉事件：「我淨係知佢好開心，都有同佢碰杯飲酒，之後我就同朋友一齊見唔到佢飲醉。」陳海琪又寸爆羅霖：「羅霖其實出咗隻歌喎，香港樂壇有救！」其後她話中有話，對森美意有所指：「你做司儀今晚有錢收喎！但係我冇㗎！」森美承認聽過這句話，但不知道她飲醉：「唔覺佢咁嘅意思，我覺得佢冇醉，因為我嗰Part原本講咗我做完佢先上台，但後來佢哋話想交接好啲，大家一齊喺台上做多一陣好啲，先交畀佢做《海琪的天空》，當時佢好有條理，好清醒。（佢掃枱？）我冇見到，因為有工作要趕，9點走咗。」因早走未有目擊的羅霖力撐：「我當佢講笑啫，我哋係朋友，佢做乜我都支持，唔覺得佢傷害緊我！」

江若琳提官司唔尷尬

而在活動上被問「單官司搞成點」的江若琳昨日出席活動時說：「其實同問『你好嗎』冇分別，平時都會被記者問及官司，唔會尷尬。佢係一個好資深嘅DJ，講嘢好得體，我唔覺佢失常。（佢飲醉咗？）Party有酒係正路，飲少少都好正常。（佢亂講嘢？）我見到佢都有講我哋之間嘅事。（佢掃枱？）我見唔到。」陳海琪昨晚在個人社交網站發聲明再度否認酒後失儀一事。而hmv老闆胡景昭因不在港而未有回應。

採：音樂組

文：專案組