溫拿樂隊傳出舉行「散Band」演唱會消息,歌迷萬般不捨,不過昨日終於傳來喜訊,五子取得共識決定「Never Say Goodbye」絕不解散,譚詠麟多謝彭健新的「解體好提議」為演唱會作宣傳,不過另一方面又想揼他,對隊友可說又愛又恨。

譚詠麟表示多謝彭健新的「解體好提議」,為演唱會作宣傳。

溫拿五虎葉智強(左起)、陳友、鍾鎮濤、彭健新和譚詠麟,齊齊做出護陰手勢。

溫拿五虎昨日為明年2月6至10日(農曆新年)一連五場假紅館舉行的《溫拿NEVER SAY GOODBYE演唱會2016》舉行記者會,鍾鎮濤(阿B)太太范姜及細女鍾幗捧場。當司儀大讚五虎靚仔時,阿倫即指住演唱會海報自爆過度「美圖」:「一睇就知係世界大騙案啦!」五虎早前拍了預防前列腺癌宣傳廣告,更齊齊做雙手掩下體的動作,阿倫說:「迎接猴年,怕人哋猴子偷桃。」主辦單位之一藝能製作副總裁葉偉忠上台派「利是」送演唱會門票,以解演唱會爆滿後,他們被追飛債之苦。

多謝健仔帶挈

陳友在台上爆料指想過舉行告別騷,故之前印了一批告別海報,但其後經商議後更改了,阿倫笑說:「吓?講得咩?違反合約精神喎!」陳友「笠水」笑說:「咁當我冇講過啦!」阿倫說:「設計其實一樣,只係字眼唔同,依家係Never Say Goodbye。(唱到80歲?)希望大家都能夠。」問到可會考慮加場,他們稱若要加場因紅館檔期最多加兩至三場,明年中可會開Part 2?阿倫暗寸彭健新:「咁快?今次宣傳食到應,嗰單嘢(傳解散)多謝健仔,講足一個星期,六日頭版,一日內頁。(之前解散係真?)真係想揼佢!」

阿B激凸爆笑

提到拍攝預防前列腺癌廣告,阿倫笑說:「個個都去得好盡。」」又指住演唱會海報笑阿B激凸:「有動靜!」陳友加多句:「有陰影!」阿倫再笑阿B是有心有力可做「前列棍」代言人,阿B和應:「用得就得啦!唔使咁威嘅!」有人笑他們的對話夠風月時,阿B竟笑到噴水。

文:音樂組 

攝:鄭家俊