洪永城及岑麗香等昨日到將軍澳商場宣傳無綫新劇《實習天使》，前晚洪永城因遺失護照而缺席《TVB馬來西亞星光薈萃頒獎典禮2015》，未能親領「最喜愛TVB電視角色」獎的他耍晒冧說：「除咗偷渡同游水之外，我都諗唔到辦法可以去到。（幾時發現？）去之前嗰晚喺屋企發現，晚上9點幾搵到第朝10點，12個鐘都搵唔到。」但他戥再奪視帝的陳展鵬高興：「妒忌佢有咁好才華。（原被安排同黃翠如進場？）我覺得唔會。（想唔想？）都係唔喇！唔想有咁多風波。」而與男友異地蜜運中的香香說：「希望大家為我哋祈禱。（男友留港工作？）要慢慢商量，我哋各自都有自己嘢做。」

洪永城及岑麗香即場鬥「戲」，大搞氣氛。

黃翠如

單立文及洪永城讓「護士」香香及劉佩玥包紮，搞到成個木乃伊咁！

單立文及陳煒晒V合照。

至於黃翠如昨日在九龍灣出席海洋公園聖誕活動，期間兩個分別叫Edwin（男友蕭正楠洋名）和Tony（好友洪永城洋名）的小朋友向她獻吻，她叫Tony不要走太近，又讚Edwin較靚仔，非常搞笑！翠如透露有發短訊取笑遺失護照的洪永城「呢啡」。