鍾嘉欣與楊思琦於2005年在番禺拍劇時神秘失蹤，多年來惹來外間不少揣測！嘉欣最近重提舊事，她透露當時被十多名手執「圓月彎刀」的男人追殺，事後令她患上創傷後遺症年半，每逢聽到開門聲及鏗鏗聲便會爆喊。 文：影視組

鍾嘉欣十年前在番禺拍攝《人生馬戲團》時神秘失蹤，原來被人追殺。

唐文龍（左起）、陳浩民、楊思琦及鍾嘉欣十年前合作拍攝《人生馬戲團》。

鍾嘉欣擔任嘉賓的無綫節目《娛樂3兄弟》前晚播出，嘉欣首度揭開十年前在內地拍無綫劇《人生馬戲團》時失蹤的謎團！2005年8月，嘉欣和楊思琦、陳浩民、唐文龍在番禺拍攝《人》劇，期間他們與工作人員唱K消遣，傳出被當地賊人打劫，更有傳思琦和嘉欣失蹤多個小時，事後無綫高層勒令相關人士封口，多年來惹來外間不少揣測！

以為實死冇生

嘉欣在《娛樂3兄弟》重提舊事，否認失蹤72小時，她透露當日是8月7日思琦生日，她希望為思琦舉行驚喜Party，唐文龍提議到只有五分鐘路程並相當安全的卡拉OK，於是叫唐文龍及陳浩民安排，嘉欣說：「唱到一點幾左右，大部分人都走晒，淨係我哋10個人走，我最心急，行到最前截的士，一開（的士）道門，有十幾二十個男人，拎住咁大把圓月彎刀跑過嚟，閃令令，我最前睇得最清楚，佢哋舉起手講『別走』（用普通話）！我覺得係追殺我哋，追到掘頭路，我覺得我哋死梗，但唔知點解有啲磚疊到咁高嘅，有啲垃圾又係疊到咁高，又有啲樹枝，零零舍舍有好大個窿，我就話『思琦！跳！』我喺啲窿罅度見到佢哋隻腳，拎咗啲電筒照住想搵我哋，嗰吓真係好驚，我係以為會死！」

無辜點錯相

其後助導致電嘉欣表示「壞人已經走咗」，但嘉欣依然相當害怕繼續匿埋：「佢愈講呢句我就愈驚，我諗會唔會一走出嚟就即刻捉我，最後我冇出嚟，又整損咗腳，最後佢搵到我哋，之後我係咁爆喊，嗰次之後真係有創傷後遺症！」她表示每次聽到的士開門聲及鏗鏗聲便感到害怕甚至爆喊，鬱結情緒維持了約一年半才平復。問到知否被追殺原因，嘉欣說：「我當係點錯相。」

嘉欣昨日接受電話訪問時表示早已走出陰霾：「遇到咁嘅事會有驚呢啲反應好正常，人遇到咩事都會有唔同嘅反應，總之依家完全冇嘢喇！（點解會再講呢件事？）唔係我提（口架）！係佢哋問，我照實答。」對於當年傳聞有「封口令」，問到無綫高層樂易玲是否知道嘉欣會再提此事？她說：「事隔咁耐，又唔喺香港發生，都事過境遷，冇所謂啦！」