祥嫂 怒轟兆尊小艾逼簽文件：係咪謀我死呀
已故慈善伶王新馬師曾遺孀洪金梅（祥嫂），與子女鄧兆尊及鄧翠玉（小艾）等再爆恩怨！雙方早年曾發生轟動全港的爭產事件，其後化干戈為玉帛，但近日再傳不和，祥嫂昨日「驚」爆除細仔兆榮外，三名子女曾拿文件到其寓所要她簽署，她當眾怒轟：「係咪謀我死呀？」對於兆尊回應「叫佢咪食咁多唔應該食嘅嘢」，祥嫂則叫他說話要講清楚！
祥嫂昨日公開大控訴，自爆與子女由去年至今都冇見過面。
文：影視組
自丈夫新馬師曾（鄧永祥）逝世後，「祥嫂」洪金梅與四名子女兆尊、兆榮、小艾及碧玉的關係可謂時冷時熱！她昨日到錦田出席活動，被問到與子女的近況時坦言激氣：「舊年過年前14日，除咗兆榮冇份外，三個仔女嚟到我大宅等我，要我簽文件，係啲授權書，仲抽出嚟要我簽，我驚呀！係咪想標我尾會？起我尾注？害過我喎，我要防呀！（有人想分家產？）做乜要分？我都未死！係咪謀我死呀？（仔女想你分？）咪騷擾我呀！（親生仔不如近身錢？）前人係咁講，金錢係萬惡嘅！我好少出嚟見大家，就係怕瘡疤好番，你哋又揭起！」
「仔女？我有生過咩？」
其後祥嫂揚言要公開挑戰子女：「仔女？我有生過咩？去年至今冇見面，我忍辱負重咁耐，唔講係唔想糟蹋鄧永祥名聲，忍到我滿身病痛，佢哋想點？係咪虐老？我係你老母呀！我唔係怕邊個，更加唔會怕我所出嘅，夠膽就出嚟，我公開挑戰佢哋！（有指鄧小艾對外表示對你服侍周到？）服侍我乜嘢呀？我行得企得，咪有事鍾無艷，冇事就話我勾佬，我好勞氣！」
唔知家產有幾多
她又感慨地回憶當年：「我同先夫喺1995年出席過呢個活動，今日我孤身到嚟，至愛嘅先夫不在，仔女冇出現，好唏噓！（你冇通知鄧兆尊出席？）冇必要咁做，我係長輩！（但切肉不離皮？）在我嚟講係！（仔女點睇？）我唔可以代答。（為家產問題有意見？）講真，做戲佬又爛賭，搵得來輸得去，有幾多？我講出嚟都怕人笑！（實際有幾多家產？）點知？喺1967年暴動時買落啲地同物業都增值咗，買咗就持有，又唔變賣嘅，點知幾多！總之我名、利、健康，三有！先夫有我呢個老婆先有，乜嘢叫興家旺業、賢內助？我喺鄧家有功有勞！」
對於兆尊一句：「叫佢咪食咁多唔應該食嘅嘢！」祥嫂昨晚在電話中說：「吓？呢句說話好多意思喎！啲紅衞兵又有軍師？你去問清楚佢，叫佢講說話清楚啲！」
