新一代兒童節目《Think Big天地》主持之一的黃愷怡（Jasmin）外表可愛甜美，非常符合兒童節目！惟起初並無預計會成為兒童節目主持的她原來對小朋友沒太大好感，當時得悉要主持兒童節目時更猶豫了一會：「本身係話旅遊節目，之後變咗兒童節目，我當刻都好Surprise亦猶豫咗一陣，因為我本身就唔係好鍾意小朋友，亦都覺得自己偏向成熟，所以都驚唔適應，不過做落先發現原來都好有意思。」

兒童節目主持黃愷怡樣子甜美，本來對小朋友沒有好感的她，卻另有一番體會。

問到Jasmin日後是否會向主持方面發展，她表示甚麼都想試：「我諗拍戲係我嘅終極目標，但我就偏向鍾意舞台劇多啲，因為我覺得舞台劇嘅準備工夫多好多，肢體語言、角色性格都要花好多時間去揣摩，唔似拍戲咁可以分場口拍同剪接，而係一次過演到尾，仲要係『直播』！所以我依家都有上啲戲劇班Keep住增值，等機會嚟嘅時候都唔會手騰腳震！」