劇集《大時代》中的「大佬孝」邵仲衡（David）最近「復出」，工作不斷！為求身體健康，他保持做運動操Fit，在私人教練指導下，健身效果事半功倍！熱愛踩單車的David期望港人多以單車代步，達到「一舉三得」！文：陳丹　攝：榮

邵仲衡決心搣甩「大冬瓜」形象，落力做運動減磅！

David支持港人踩單車代步，既環保又可強身健體。

早前憑重播劇集《大時代》翻Hit的邵仲衡回味活躍戲劇的時光，亦希望家人漸漸了解娛樂圈生態，支持他「復出」：「真係估唔到，觀眾口味可能唔同咗，又留意番我哋！年輕人可能睇得多外國劇，發覺以前啲電視劇原來咁激，又突然鍾意睇我哋，真係唔可以講呢套劇唔『神』！重播後香港以外嘅華人都留意到，好多以前首播被忽略嘅線都被重視，對我嚟講係神奇旅程！不過，始終識老婆時已經冇做呢行，佢身邊好多朋友可能會問長問短，我同佢講『唔緊要，慢慢就習慣。』希望畀多啲時間屋企人去接受。」

半夜論盡「撻生魚」

現時身形較Fit的David笑言「頂唔順」以往笨拙的身軀，為保持身體健康而落力減磅：「大吉利是講句，死都咪死得咁辛苦啦！持續運動同注意飲食好重要，呢兩、三年返嚟香港住之後都認真去做運動，參演舞台劇又有Personal Coach同我哋做運動，咁先至發現有私人教練效果差得遠！用人哋個方法做一個Section，差唔多等於自己喺屋企做兩至三日嘅效果！我有段時間係笨重到成日整親自己，夜晚去廁所都好似『撻生魚』咁仆低起唔番身咁滯，落樓梯又唔自然，慢慢Pick Up番做運動就有改善，肌肉都紮實啲！即使食好多保健食品，但唔去做運動，啲關節都一樣唔吸收！」

踩單車一舉三得

熱愛踩單車的他希望香港多提倡以單車代步，可減少空氣污染亦可強身健體，可謂「一舉三得」，他說：「香港駕駛者一路唔慣單車喺馬路行，希望大家都畀多啲關懷踩單車嘅人，同時亦踩多啲，其實歐洲已經好流行以單車作為主要交通工具。我個細佬仲參加三項鐵人賽，當然我玩嗰啲冇咁戰鬥格，但我住嗰頭都有空間踩吓單車，所以都好鍾意呢項運動！我以前比較鍾意汽車同電單車，但年紀大咗思想亦成熟咗，依家唔會揸快車，反而享受機械本身嘅韻律。」