影帝黃秋生、視帝黎耀祥與馬國明等昨日宣傳台慶劇《梟雄》，談到蔡思貝的學歷被質疑，秋生力撐對方為人誠實，又指當中可能有誤會。 文：影視組

秋生與陳煒攬腰大跳社交舞。

秋生指蔡思貝的學歷風波可能有誤會。

祥仔（右）姣拑馬明，非常搞笑。

蔡思貝

黃秋生昨日與黎耀祥（祥仔）、馬國明（馬明）及陳煒等出席台慶劇《梟雄》宣傳活動，秋生跟蘇玉華及陳煒攬腰大跳社交舞，祥仔則反串擺出「姣樣」拑實馬明，場面搞笑。秋生表示劇集反應不俗，獲讚演得好的他說：「多謝，心都定啲。（拎視帝？）唔敢當。」他又與劇組合作開心想再拍劇。

馬明錫陳煒讚好正

提到蔡思貝（Sisley）的學歷被質疑，作為Sisley戲劇導師的秋生力撐對方為人誠實，認為Sisley不會坐監：「件事點都未知，畀機會佢整理、解釋，或者係誤會。如果呃呢啲嘢做特首、教授就有問題，但如果呃呢啲做侍應冇乜所謂。」對於巴黎發生恐襲，他呼籲不應向惡勢力低頭：「咁樣已經係同全人類挑戰，如果各國都唔合力制止，再搞落去核武就不得了。」洪永城發文稱「KILL ISIS」，問到會否擔心其人身安全？秋生笑說：「都驚嘅！用英文寫就抆抆哋。」

劇中，陳煒露玉背又跟馬明錫錫，馬明搞笑地說：「好正，好好咀，網上好多人話大佬嘅女人好刺激，原來啲網民幻想好豐富。」陳煒自爆戲外不斷遭馬明調戲，被嫌露得少的她笑說：「下次露多啲囉！（可以去到幾盡？）係馬明就幾盡都得！」

祥仔挑戰「乸型」

《梟》劇上周平均收視25點，最高達27.3點，問到是否滿意？祥仔說：「網上點擊率40、50萬都好高，依家生活習慣改變咗，傳統收視25、26點都唔差，但唔會好似以前突破30、40點，所以計埋點擊率都差唔多。」他又笑言拑住馬明好舒服，又指有興趣挑戰「乸型」角色。另外，歐陽震華、萬綺雯主演的《東坡家事》上周平均收視25點，最高28點。