不經不覺，張惠雅（Regen）已出道八年，工作大過天的她常為事業感氣餒，但樂觀的她卻從不怕捱苦，希望可以捱到出頭天，在樂壇找到屬於自己的定位：「好想有一日，大家會話好想聽我唱歌，亦希望有一日可以開到自己嘅演唱會！」為了事業努力衝刺，Regen不惜決定「守齋」三年，同時亦好讓自己學會不心急，等待真正的Mr. Right。

曾在情路受傷的Regen決定30歲前為事業衝刺。

Regen希望有一天可以舉行個人演唱會。

面對接二連三的不如意事，Regen仍積極樂觀。

多次演妹妹仔的Regen有意挑戰變態殺手角色。

Crystal（右起）、Regen與Winkie於2007年組成HotCha出道。

為了變得堅強獨立，Regen經常獨自旅行。

文：音樂組　攝：劉斌

於2007年出道的張惠雅是前組合HotCha成員，唱而優則演的她曾參演過電影和劇集，然而風光背後，獨立發展的她坦承常對事業感氣餒：「我15歲簽公司，唔怕辛苦捱咗咁多年，但大家都睇唔到有咩成績，可能到呢刻人哋都記唔到我叫咩名，仲係叫我HotCha，覺得我係可有可無，呢啲係會唔開心。」

自認變態

要求不高的Regen最想可以在樂壇有個屬於自己的位置：「好想有一日，大家會話『好想聽Regen唱歌』，然後有一日可以開到自己嘅演唱會，大家嚟聽我嘅歌、睇我嘅表演！」除了唱歌外，Regen亦愛演戲，並希望大家接受她唱歌和演戲皆可，而曾多次飾演搞笑妹妹仔角色的她自言內裏「變態」，更有意挑戰變態殺手角色：「我個人都幾變態，例如我鍾意睇啲食蟲節目，愈核突、血腥就愈鍾意睇，所以想試呢啲另類嘢，可以發洩我變態嘅一面！」

工作方面Regen滿腹大計，感情方面她同樣早有計劃，現年27歲的她決定給自己三年「守齋期」，盡力在30歲前為事業衝刺，好讓自己行一條更肯定的路、更清楚自己的方向，到30歲時才再想拍拖的事。自17歲開始情竇初開，但多年來兜兜轉轉都未找到Mr. Right，Regen坦言曾為此灰心氣餒：「可能以為呢個人係啱，但拍咗落去先知唔適合，試過怕咗唔敢再去拍拖，到隔咗一段時間再拍，但又唔係好啱，所以幾氣餒。」每次拍拖都會上一課，令她終於真正發現「愛的真諦」：「依家發覺諗嘢一直都錯，其實係要對自己好、錫自己，人哋先會鍾意自己。依家對我嚟講，一樣好肯定嘅擇偶條件係要識呢個人起碼一至兩年先，仲要係同呢個人真心認識。（之前好多都太快開始？）係囉！有時自己心急，拍拖雙方都係認真，但最後搞到大家遍體鱗傷都幾慘。」

環遊世界

分手並非壞事，至少經歷初次拍拖分手後，便令Regen開始從倚賴人變得堅強獨立：「第一次分手後個人開始轉變，由嗰陣開始自己睇戲、自己出街，學識一個人都唔係咁慘，一個人都可以好開心，所以18歲中學畢業後就開始一個人去旅行。」獨自遊歷過多個地方的Regen表示，心願是環遊世界，下次就想挑戰一個月的長旅行，目的地隨心決定：「好想先決定一個出發地點先，然後去嗰度認識唔同朋友，認識唔同國家好玩嘅地方，之後再揀下一站去邊，西藏係其中下一站想去嘅地方。」她亦坦言每次旅行最深感受是聽別人訴說故事，有次去尼泊爾聽過的一番說話，令她刻骨銘心：「有個男人同我講『旅行係同旅遊唔同，旅遊係去玩同行街，但旅行就真係用腳行出嚟』，我覺得講得好啱，旅行係要用心體驗。」

服裝：Monki

場地：尖東CEO Neway