波鞋近年在時裝界可謂大行其道，各大運動品牌都推出不同的限量版、復刻版波鞋，令一眾年輕人趨之若騖！歌手馮允謙（Jay）亦中招，他在加拿大讀書時已愛上打籃球，更對球星Michael Jordan（MJ）情有獨鍾，他從那時起就有收藏波鞋的習慣，家裏已收藏逾60對波鞋！

愛波鞋的馮允謙更愛MJ，他因對方而下決心追夢做歌手。

馮允謙大晒珍藏品，卻只是冰山一角！

Jay笑言照片裏的波鞋只是其中一部分，因有些波鞋收藏在加拿大的家中：「我好傻！有啲限量版我通常唔會着，啲人話如果唔着個鞋底就會甩，所以我每次返加拿大都會拎啲波鞋出嚟檢查，有時仲會拎出嚟欣賞。」問到收藏最貴的一對波鞋時，他指是2003年由父母送的Air Jordan 18代，約2,000港元。另外，喜愛MJ的他表示決意做歌手的原因亦是因為MJ：「好欣賞MJ傳達嘅Message，就係勇敢去追夢，所以先下定決心做歌手。」