減肥是女人的終身事業!早前興起的「反手摸肚臍」及「放銀仔落鎖骨」,其實都離不開一個瘦字。近期加入娛樂圈的唐貝詩屬標準身材,但深信上鏡比真人肥十磅的她,近月投身健身行列,並選擇從運動及健康飲食着手,操弗殺入影壇兼瘦出健康生活!

以往從不運動的Lydia,近月為事業與健康而落力操練,曲線變得更玲瓏!

Total Resistance exercise
訓練肌肉

Fit Ball

全方位操弗的Lydia做埋瑜伽,可謂「動靜皆宜」!

Battle Rope
鍛煉核心肌肉及訓練左右平衡

ViPR
提升心肺功能、力量、平衡力及強化核心肌肉

Boxing

寇鴻萍女兒唐貝詩(Lydia)最近加盟蕭定一公司成為演員,自言從不做運動的她,數月前積極跟健身教練做運動,操弗殺入電影圈,並於短短三個月減掉5公斤,成績理想!Lydia表示每日堅持做一小時帶氧運動,但不會只做某一種,而是各種運動都做,由普通的器械到近年流行的TRX、Battle Rope及ViPR等,以鍛煉身體不同部位,而多元性亦可增加做運動的樂趣。

變大隻唔係咁易

TRX全名為Total Resistance Exercise(懸掛式阻力訓練),由前美國海豹突擊隊隊員Randy Hetrick設計,是以一條尼龍伸縮帶透過體重,以不同傾斜度及動作訓練肌肉,荷里活女星Jennifer Lopez及巴西超模Gisele Bundchen都是愛好者之一。Battle Rope(戰繩)則用兩條直徑約1.5吋的繩子,以不同動作去擺動,鍛煉核心肌肉及訓練左右平衡。至於ViPR分別代表能量Vitality(Vi)、表現Performance(P)及重建Reconditioning(R),利用一個貌似大炮管的圓柱形塑膠管作器材,進行動力及舉重運動,能提升心肺功能、力量、平衡力及強化核心肌肉,塑膠管的重量由4至20公斤不等。

Lydia指不少女生都怕變得「大隻」而對健身避之則吉,惟她覺得是個誤解:「其實每日只做一個鐘,根本唔會變得大隻,我健身時一直有磅重同檢查脂肪肌肉比例,發現只係磅數輕咗,但脂肪肌肉比例冇變,變大隻其實唔係咁易。」她表示除了減磅外,體能亦比以往好:「記得我初初只係做半個鐘帶氧運動已經要停,但依家做一個鐘都冇問題。」

走醬戒夜蒲

此外,Lydia亦注重飲食,實行雙管齊下:「早餐會食澱粉質,中午就減少澱粉質攝取量,晚餐就完全唔食澱粉質,唔會節食,亦唔會食得太清,因為怕反彈,每餐都會食得飽,但就要選擇健康嘅食物,例如盡量走醬汁,或者將醬汁同食物分開上。」為了減肥,Lydia表示連夜生活都可免則免:「以前做嘢壓力大,都會約朋友去夜店飲嘢輕鬆吓,但啲嘢飲其實好高熱量,所以為咗減肥,連去夜店消遣都冇。」她坦言為減肥而堅持每日運動及更注重飲食健康,甚至連作息時間及生活都變得規律,整個人也健康不少,比起瘦身,這個意外收穫來得更大!

文:陳嘉敏

攝:劉智源