黃美棋昨日拍攝食品廣告時被狗拍檔「激咀」，但埋位時卻遭冷落，她即自嘲慘被「(口趙)完鬆」！美棋又揚言早已諗定餐單「箍實」未來男友的味蕾！

狗狗一招極速伸脷，美棋想縮都縮唔切！

美棋一見到咁可愛嘅狗狗即刻攬到實唔願放！

正式開拍時，美棋嘗試以食物留住狗狗。

美棋即場以鼻試味，測試吓自己廚藝有幾掂！

黃美棋昨日於觀塘拍攝食品廣告，以居家Look上陣的她化身「論盡」女友，要靠狗狗找來罐頭，再親自下廚煮快餐冧爆男友。只見美棋興奮地逗狗狗拍檔玩，引得狗狗熱情地伸脷狂吻作回禮，結果美棋嚇至花容失色，更爆笑向狗狗「投訴」：「我第一次見你咋喎！你錫我咁多啖嘅！」

滿意六位數酬勞

美棋以為成功與狗狗混熟，怎料正式拍攝時，狗狗卻對她不理不睬，更愈叫愈走！美棋立即扮可憐，又笑說被「(口趙)完鬆」！受訪時，美棋透露以近六位數接拍廣告，對酬勞相當滿意：「仲可以同咁靚仔嘅『靈感男神』狗狗做對手戲。」

中西餐箍實男友

問到何時找個真男神當男友？美棋自爆早已諗定餐單「箍實」未來男友的味蕾：「我諗定餐單，要留住男人嘅心，就要箍住佢條脷！」談到若心儀對象廚藝了得？美棋即自認廚神下戰書：「咁要比試過先知，我識煮中式、西式、泰國菜同甜品。最叻煮西餐，夠浪漫。」

文：影視組