李彩華近年在內地人氣爆燈，劇酬據知已漲至30萬人民幣一集，單是拍劇，今年已進帳約2,700萬人民幣，近日同時拍攝兩劇的她，為免順得哥情失嫂意，每次花五小時來回拍攝場地，大呻錢唔易賺，更謂要長期黐實藥煲，調理身體。

Rain今年單是拍劇已進帳3,300萬港元。

《家國恩仇記》

Rain拍攝《天下正道》，荷包進帳不少。

Rain憑與凌瀟肅合演的《回家的誘惑》再度爆紅。

李彩華（Rain）早年將事業發展重心移師內地，深受劇組愛戴的她，早前憑內地劇《回家的誘惑》，人氣再上層樓，據知現時劇酬已漲至每集30萬人民幣（約37萬港元），除早前拍畢的30集《獨立縱隊2》外，更分別接了各30集的《家國恩仇記》及《天下正道》，今年單是拍攝3部劇，已為Rain進帳約2,700萬人民幣（約3,300萬港元），但她卻大呻辛苦錢不易賺。

深陷泥漿

Rain坦言有苦自知：「嗰啲都係辛苦錢，因為《家》劇同《天》劇都好趕，為咗唔影響進度，我情願自己辛苦啲，喺浙江拍完《家》劇，收工就即刻趕去橫店拍《天》劇，每次來回車程要五個鐘，成日就係咁來來回回，但咁都唔算辛苦，最辛苦嘅係兩個劇角色反差好大，《家》劇我做粗豪土匪，仲要喺泥漿監視敵人，啲泥漿又凍又難行，《天》劇我演斯文大家閨秀，搞到我有啲精神分裂，惟有喺車程中調息自己。」

五勞七傷

Rain又透露現時黐住藥煲做人，她說：「長期喺內地穿州過省工作，天氣又凍又熱，成日傷風感冒，長期睇醫生，拍動作戲又搞到五勞七傷，每次返香港都搵醫生做全身檢查，平日就花唔少錢買中藥調理，長期黐住藥煲做人，但我OK，唯一擔心係怕媽咪為我擔心！」

文：影視組