莊思敏前晚一臉病容出席萬聖節活動，原來事前於保母車上狂嘔，未知是否「食錯嘢」，但有朋友懷疑她撞鬼！適逢新片票房不俗，莊思敏笑指若然對票房有利，絕不介意「撞耐啲」！而同場以「妖后」造型性感登場的原子鏸，對舊愛鄧健泓有意結婚表示恭喜。

莊思敏到場時一臉病容，原來剛才在車上狂嘔，疑似撞鬼！

原子鏸黑Bra加魚網絲襪超性感，不過對跳慣鋼管舞的她來說，濕濕碎啦！

扮成低胸貓女的Jocelyn與老公恩愛到場。

區文詩以嘔血犯人Look現身，幾有心思！

邵音音額前貼符，造型騎呢得嚟又夠驚嚇！

莊思敏、沈震軒、原子鏸、邵音音、區文詩、Jocelyn及老公Anthony等，前晚現身中環舉行的萬聖節活動，各人均悉心打扮應節，成為現場人士集郵「獵物」，場面熱鬧！不過冇厘精神的莊思敏，搭自動電梯時已木無表情，原來她在活動前為新片《碟仙碟仙》進行了幾場謝票，期間突然身體不適，起初也頂硬上，但最終敵不過病魔，於保母車廂中狂嘔！

唔介意撞耐啲

猶幸當時莊思敏對着垃圾桶內的膠袋嘔吐，事後助手亦有清理車廂，她說：「我一心諗住嚟玩，依家惟有返屋企休息，冇睇醫生，都唔知係咪食錯嘢，有人就話我撞鬼！尋日我撞到一個相士，佢話如果真係撞到嘢會嘔，但我就唔知係咪。」新片票房理想，問到是否因撞鬼令票房不俗？莊思敏笑說：「咁我唔介意撞耐啲，但落畫就好停囉！」

而原子鏸以電影《X-Men》的妖后造型現身，穿魚網絲襪又露出黑色Bra，性感又誘惑！不過子鏸卻淡然地說：「平時跳鋼管舞都係咁，所以冇乜嘢！（唔終極啲跟足電影角色，全身塗晒藍色？）唔想皮膚受傷害，同埋都唔會咁啦！一定要有嘢喺外面保護皮膚。」

原子鏸恭喜舊愛

談到感情生活，子鏸不欲多談，只表示傳媒經常拍到的不是其弟弟，便是她的男同性戀朋友，問到真命天子可有出現？她說：「冇呀！（前男友鄧健泓都話要結婚啦！）係咩？咁要恭喜佢，不過我哋好耐冇聯絡。」

已有一段時間沒有參演無綫劇的沈震軒表示雙方就合約問題拉鋸中：「兩年前已搵我傾加簽，當時仲有三年約，公司係有畀機會我，但我又覺得唔需要咁快決定。（掟入雪櫃？）我OK！畀啲時間自己進修，劇接劇會做死個藝人，我都希望有進步。」至於邵音音對於《碟》片票房走勢大感滿意，更指若然開續集也不介意參與，現時忙於為電影四圍飛宣傳，幸好每個地方都住靚酒店及食好東西。

另外，莊思敏昨日現身旺角為新片造勢，惹來途人圍觀，而莊父早前在港被拍得出入診所，她則不欲多言：「老人家點都會有病痛，不過OK嘅，佢依家喺馬來西亞休息緊，多謝關心！」

文：影視組