擁有噴血身材的模特兒張可義（Emily）工作接踵而至，即將在微電影扮人母的她，笑言平時錫寵物如親生孩子一樣，投入角色簡直Easy Job！她亦感恩模特工作令她入行逾三年以來得着甚多，期望未來有更多影劇方面的發展，更直言不怕挑戰醜角，幾醜都OK！

張可義拍下不少迷人靚相，但估唔到太靚都會嫌悶，心思思想扮醜！

張可義主力做模特兒，但同時向演員之路進發，兩線發展！

張可義曾擔任《東網Baby》女主角，她坦言因而工作量激增，最近拍廣告又拍微電影，以模特兒工作為主線，一邊發展演員之路：「嚟緊會喺微電影做媽媽角色，之前拍廣告試過扮媽媽，覺得應該同養狗差唔多，我都好錫自己嘅寵物，所以我諗都拿捏到嘅！」

從「模」學人生

全職做Model已逾三年，每日接觸不同的人和事，這種工作模式令Emily的人生歷練更豐富：「每日接觸唔同人，每次嘅工作亦唔一樣，唔係話我今日做錯嘢我聽日可以做番好，而係今日做啲咩今日就要做得好好！Model工作畀咗好多挑戰我，每次都要畀壓力自己做到最好，亦令我喺人生中學習到更多，更珍惜身邊嘅人同事！」

哨牙都唔介意！

談到對未來的寄望，Emily希望挑戰醜角，揚言肯為角色豁出去：「好想嘗試拍喜劇或者挑戰做醜角！平時做Model工作都要扮到靚一靚、Chok到行，如果可以表現真我就好喇！本身性格都癲癲哋！」

她又說：「醜到好似易容咁都OK，哨牙都唔介意，扮醜扮到最深入民心嘅我諗係趙薇嘅『阿梅』，真係好大膽，我覺得我都接受到！我兩位男神係吳彥祖同古天樂，就算做喜劇扮醜，都希望對手係佢哋，我諗佢哋唔會嚇親啩！仲可以乘機大膽啲放啲同佢哋打開話題！」