男神周柏豪慘變鹹星

前女子組合AD2成員艾美琦（Amy K.）主演的電影《色模》最近頻頻宣傳，以Amy露點戲及情慾戲做賣點，但原來《色》片還有男神周柏豪、趙碩之、王璐瑤（LuLu）及賈曉晨等卡士，配搭相當「新鮮」！

趙碩之：冇眼睇

原來周柏豪、趙碩之等於六年前拍攝喜劇《我要做o靚模》，惟電影一直未有上映，戲中柏豪更反串風騷靚女，據知當年是新人的他片酬只有約10萬元，相隔六年柏豪現已是男神歌手，身價自然幾級跳！最近電影公司重新包裝《我》片，並加入新演員Amy及落選亞姐陳沛鈺與前亞視藝員楊正軍的大膽情慾戲，再將兩片合而為一變成《色》片，並以曹查理飾演的好色「o靚模大亨」穿引兩個故事，雖然《色》片只被評為IIB級，但此舉令柏豪及碩之等慘變情色片主角！海報上更印有他們的大頭相，並放在Amy的裸照旁邊！

對於舊片被「加料」翻新推出，柏豪透過經理人回應指沒有人告知有此安排，他無奈說：「做演員只係盡力表現，之後嘅嘢控制唔到，搵唔番當年嘅負責人，冇諗住追究喇！」碩之表示當年拍攝的是一套喜劇，但無奈現時加入大量情色成分，令她「冇眼睇」：「得啖笑，最多會睇自己嗰Part，估唔到現實生活嘅事比劇情更好笑，海報甚至連我個名都寫錯做『碩芝』！（追究？）當年係經理人公司幫我接戲，依家好難追究。」LuLu則說：「以前冇上映係遺憾，但依家加咗啲古靈精怪戲份，慘不忍睹。」

力撐有教育意義

至於新片部分女主角Amy對於電影公司的安排沒有意見：「戲中我要裸露，心理掙扎好耐，冇理其他事。（套戲變咗情色片？）其實套戲係有教育意義，講時下女仔發明星夢而畀人呃，想警愓觀眾要小心壞人，有警世作用。」至於製作《色模》之電影公司，則對「二合一」一事，不作回應。