最新一期《好報》披露王祖藍升呢為邵氏兄弟電影製作人，又以千萬酬金接內地真人騷，難怪他財來自有方，早前豪擲1.14億元購入逸瓏灣獎勵太太李亞男，日前孖住老婆和舅父睇新居盡顯愛妻號本色。祖藍接受本報訪問時，揚言希望日後成立經理人部門，為香港藝人開拓米路。 文：專案組　攝：追蹤組

祖藍為老婆李亞男撐傘擋風雨，認真廿四孝老公。

李亞男（左起）、舅父冼偉智及祖藍冒着風雨睇新居。

李亞男父母冒着風雨上陣，前往拍攝真人騷。

最新一期《好報》披露王祖藍升呢為邵氏兄弟電影製作人，十分威水！

王祖藍近年積極往內地發展，吸金能力超乎想像，早前豪擲逾億元買豪宅贈愛妻李亞男可見一斑！最新一期《好報》拍得王祖藍日前冒雨與太太李亞男睇新居，同行還有舅父冼偉智，由於風大雨大，祖藍撐起巨傘護妻，名副其實超級愛妻號。由於新居逸瓏灣近3,000呎，更有私人泳池，婚後「解禁」的兩口子點「反」都得，難怪打算先過兩年甜蜜二人世界，才全力造人。

開新戲攻內地

祖藍買得起億萬豪宅，自然財來自有方，已接千萬酬金真人騷《女婿上門了》，據知邵氏兄弟更將開條新Line給祖藍孖住王晶、劉偉強和陳友等影壇重量級人物製作電影。

祖藍身家十級跳，昨日接受本報電話訪問時，談到「升呢」做邵氏電影製作人一事，他說：「我希望開闢內地巿場，為香港藝人謀出路。」對於擔任邵氏製作人，祖藍稱稍後將開拍一部古裝、一部時裝電影，而《老表》系列將有另外計劃，暫不能公布！

新居啱晒生B

祖藍更希望做埋經理人：「今次做製作人，除開戲外，主要想幫香港演員開拓內地巿場，如果我間製作公司穩定嘅話，希望搞埋經理人部門，憑目前關係幫香港演員搵啖飯食，因為香港演藝方面機乎飽和。（安排亞男工作？）佢都有工作拍緊，好忙，我除咗係佢老公外仲係佢老闆！（同外父外母一齊拍節目？）係呀！呢個都係亞男最開心，因為佢可以見到爸爸媽媽，而我又有時間同外父外母相處，都係一件開心嘅事。」

對於買大屋，他說：「我哋今次搬大咗，若果有BB嘅話就唔使搬啦！不過亞男真係幾慘，自從我多返內地工作，就變咗一人世界，所以我哋都係想過多兩、三年二人世界先！」