憑《愛．回家》「馬子妮」一角深入民心的無綫小花蔣家旻，坦言劇集尾段的戲份對她挑戰很大，感激該劇令她打好演藝根基，殺入影壇做女主角。入行8年，蔣家旻未覺行得慢，循序漸進才是上策。而與男友穩定發展中的她，笑言對結婚生B未有Concept，但決意不擺酒搞隱蔽私人Party，避免在大日子忽略摯友！

與男友感情穩定的Angel，希望33歲前嫁人，並憧憬去沖繩或關島的小教堂開Cocktail Party。

Angel憑《愛．回家》「馬子妮」一角入屋，與黎諾懿、劉丹和羅天宇等馬家成員打成一片。

入行8年的Angel覺得循序漸進才是上策。

Angel與黃宗澤合作《警犬巴打》。

劇中Angel、張嘉兒和朱千雪飾演三姊妹。

文：陳丹 攝：劉斌

無綫劇《愛．回家》令蔣家旻（Angel）知名度激增，她直言尾段與親生母親相認的戲份令人發現新的「馬子妮」，又挑選拍攝3年來的3大深刻場口：「出街啲人都叫我『子妮』，個角色好入屋。臨尾有認番親生媽咪呢啲好Heavy嘅戲，劇情轉變好大，大家會睇到『馬子妮』嘅變化。有好多喊戲要好投入，朝早8點化妝，9點入廠可能會未Warm up。」Angel入戲要訣是將劇本內容幻想成真實的事，再以對白牽引自己：「我會諗現實生活遇到呢啲事，同埋消化晒啲對白，演嗰陣就用對白帶動情緒。另外自己條感情線都好Sweet，一開始暗戀『阿豪』，到好鍾意佢，覺得佢蠢、一啲反應都冇。仲有幾個年輕人一齊搞『漫活工房』，反映時下追夢創業難，但大家都去堅持，好熱血同青春！」她坦言《愛．回家》令她認識眾多好友：「對咗3年好似一個Family咁，見佢哋仲多過見屋企人，有心事都會同『馬家』傾！」

細個愛扮楊貴妃

入行轉眼8年，Angel以慢慢進步評價自己，又稱已改變以前愛與人比較的習慣，將Focus放回自己身上：「演技要浸番嚟，再加生活經歷，真係唔可以心急！雖然冇突然彈到好高，但觀眾會睇到我一步步成長緊。每年都好多新人，但每個人戲路、外表同性格都唔同，佢做到嘅角色我未必做到。要繼續行演員呢條路，最大嘅競爭對手始終係自己！每個演員都要花好多心機同時間去研究，一定要突破，令人覺得我依家個角色同之前唔同。」她亦趁機為新劇宣傳：「喺《警犬巴打》會做Bosco（黃宗澤）最細嘅妹，佢會身兼父母職照顧我哋三姊妹，大家姐張嘉兒、二家姐朱千雪，我老公就係梁烈唯。我同佢之間會有關係上嘅變化同火花，觀眾可以期待吓！」

一人有一個夢想，Angel小學已立志做演員，人細鬼大的她更偷拿母親的長裙及絲巾扮「楊貴妃」：「由細到大都跳舞，但冇好似啲朋友咁好想做Dancer。細個好迷卡通片同電視劇，睇睇吓就自己扮，發覺自己有興趣，到中學有戲劇組即刻參加，亦好好彩喺未正式入行前參加過Y2k，接觸過電視劇壯大個膽。咁啱見到無綫有招募就參加咗，入去讀訓練班，條路好似係個天安排咁。最初身邊有人反對覺得呢行唔穩定，但自己冇因為人哋嘅說話改變！」

喜歡小朋友

女人總愛幻想出嫁天，與男友感情穩定的Angel卻笑言未有結婚及生B的念頭：「感覺太早，細個好想25歲結婚，但已經25歲又未去實現呢步，入咗行之後好多時間都放喺工作，結婚呢個諗法押後咗。依家希望33歲前嫁，30歲係女人嘅新階段，所以應該喺最靚嗰時影婚紗相。以前覺得擺酒最開心，但係嚟婚禮嘅人未必個個好熟，會令你忽略某啲人，依家會想去啲靜靜哋嘅地方請啲最Close嘅朋友嚟，沖繩或者關島啲白色小教堂搞個Cocktail Party，簡單而浪漫，唔需要好華麗。生B都未有Concept，人係應該一代一代咁繼續，但依家要考慮埋經濟因素等等，所以要慎重考慮，但我好鍾意小朋友。」