關心妍（Jade）昨日在將軍澳一間酒店出席義工獎頒獎禮，她透露做了義工11年：「成立咗基金，唔想掛住籌錢，想去啲學校燃亮學生嘅夢想。我想每個星期去4間，1日去兩間，全港有好多學校，如果去晒要10年時間！做過Research睇佢哋想知乜，個個都想知我以前喺外國生活有幾曳，同埋由曳變乖嘅過程，呢樣嘢同佢哋最切身。（試過有幾曳？）13、14歲就食煙飲酒，走堂、離家出走都試過，所以想話畀佢哋知曳過唔緊要，最緊要識搵番自己！老公係其中一個司機，都係義工一分子，用少啲時間玩同睇戲，一齊幫手派嘢都好。」

關心妍期望以過來人身份助學生返回正途。

提到新歌《人生銀行》MV有鄭欣宜的(界刂)手橋段，被批評教壞細路，她指畫面是反面教材：「想講好多人會因為情傷做傻事，而阿Yu（趙頌茹）後尾有摑欣宜一巴令佢清醒，所以係有背後意思，唔想大家Focus喺(界刂)手度。」