龐卓欣冇戴安全帶 死撐泊緊車
「是非港姐」龐卓欣自參選以來一直話題多多，日前她上載與男友遊車河時冇戴安全帶的照片，即被網民「聲討」並指有觸犯法例之嫌。有「寸嘴Ada」之稱的她，一改其寸嘴本色，為護愛郎惟有尷尬死撐，辯稱當時只是泊車！
應屆港姐亞軍龐卓欣，今次真係有排解畫喇！
龐卓欣（左）與郭嘉文出席活動，對冇戴安全帶一事死撐當時只是「泊緊車」。
龐卓欣（右起）早前與男友Solomon及她的父母，「一家四口」合照。
出爐港姐亞軍龐卓欣（Ada）自參選以來是非不斷，經常與男友Solomon高調晒愛的她，不時會於網上放閃光彈，大晒與男友的甜蜜照，今次更為與男友自拍而以身犯禁，被一眾網民「聲討」！
在中秋節當日，Ada於Instagram上載一張與男友駕車時的合照，並留言寫道：「Where are we off to today？」照片中，同坐前座的他倆亦各自抱着愛犬，惟安全帶雙雙都未有扣上，因而引來不少網民紛紛留言提醒及「質問」為何冇戴安全帶，Ada其後「知衰」急急刪除照片！
為男友護航
Ada與港姐季軍郭嘉文昨日出席《HK WE CARE 香港開心D》活動時，被問及冇佩戴安全帶一事時，即一臉尷尬，平時口若懸河反應快的她，深知接招無力，惟反問記者：「咁你想我講咩？」猶豫一會才解釋當時是為了調校「自拍神棍」而除下安全帶，問到當時是否行車途中？Ada即「死兜」解畫稱當時正在泊車：「唔係，係泊緊車。（下次會小心啲？）會，網民提醒我嘅時候我已經第一時間刪除咗（相片），當時真係唔記得咗，自己都要留意番呢樣嘢。」雖然Ada落足力為男友護航辯稱當時「泊緊車」，但其實此舉亦分分鐘觸犯法例。
未簽約無綫
至於工作方面，問到無綫有否通知她們拍劇，Ada表示未與無綫簽約，仍在了解中：「要諗吓自己想要啲咩。」但她強調絕非打算疊埋心水嫁人做少奶奶！至於同場的郭嘉文則坦言已跟無綫簽約，但合約年期並非長達十年：「工作要等公司安排，我就想參加多啲訓練班。尋日我都見到黃秋生，都想跟佢學戲。（佢會狠批(口架)喎！）有批評先有進步。（佢話新人冇Character！）咁我都仲有好多進步空間。」
採：影視組 文：專案組
