童星出身的藝人李日昇，早年曾在經典劇《溏心風暴之家好月圓》中飾演少年版「管家仔」，憑英俊外表及成熟演技而成一時熱話。當年屢在教育電視演出的他不知不覺已經23歲，並入讀了無綫藝員訓練班，更由黃毛小子變成大隻佬，他說：「本身想考消防先練大隻，但拍《愛我請留言》嗰陣，黃浩然鼓勵我參加藝員訓練班，咁我又一向鍾意表演，咪入行囉！」

李日昇練大隻一心做消防員，但最後仍做番老本行。

一副童顏的李日昇將於新劇扮傻仔。

畢業後，李日昇雖然多數演「跑龍套」角色，但他仍盡力演出：「後生係最捱得，拍劇的確係過緊非人生活，但都頂得順，可能我事業心重啦！」直到最近終獲機會，他於劇集《城寨英雄》中飾演智障男並有較多戲份，為了演出更親身到訪庇護工場作參考：「我想做得自然啲，唔想畀人覺得係『扮傻』，老實講其實做傻仔即做番我自己啫！」