新進組合Fantaz與B.Gs熱心參與行善，BGs更將早前推出的寫真集收益買物資送暖，而Fantaz亦希望透過音樂的力量去幫助更多人！

B.Gs捐錢又出力，出資買物資派贈弱勢社群。

Fantaz三位大男孩希望以音樂力量幫助被社會忽略的人。

男子組合Fantaz與女子組合B.Gs分屬同門，工作以外還熱心行善，B.Gs表示早前推出的寫真集收益會用作慈善用途：「扣除成本後，我哋會用寫真集嘅收益買物資派發畀低收入家庭同老人家，因為覺得只係捐錢，同肯花時間去做慈善係兩回事，得着好唔同。」

師弟Fantaz則透露多參與義工活動，原來四年前一次經驗，令成員Tom、Jaz與Nel決心以音樂幫人：「我哋四年前透過朋友參加咗一個關於認識自己同夢想嘅Project，我哋唔單止透過音樂認識自己，再遠大啲係透過音樂力量去幫助更多人，做義工後睇到社會上有好多人係被忽略。」

面對當今樂壇組合輩出，問到有何優勢突圍？Fantaz自言唱得又作得：「第一首歌到依家，好多都係我哋親自寫曲！雖然詞唔係我哋寫，但嚟緊嘅方向都會行番唱作路線，仲會玩埋樂器或者玩Acapella（無伴奏音樂）！」

勝在團結贏經驗

至於B.Gs四位成員YoNa、Ceci、Jovi與Onna則自言比其他組合更團結：「因為平時放假、睇戲、食飯都會一齊！我哋上個年度主力喺內地做巡迴，以新進女子組合嚟講，我哋攞到好多演出經驗！公司又畀好大參與度，喺作曲填詞時都畀我哋擺好多意見落去，同埋幫手填詞嘅同事好了解我哋，將我哋心聲同平時嘅面貌都寫落去。」

文：專案組　

攝：劉斌