藝人陶枳樽（Crz）日前專程到旺角點心店，「潮食」近期因外形可愛而人氣爆燈的蛋黃哥點心。Crz自爆最愛當中的「嘔吐」流沙包：「最得意係戳穿佢（流沙包）個口後會嘔嗰個流沙包！」問到日常會否下廚？她自爆愛食魚生，故不用入廚：「我鍾意食生嘢，所以買（刺身）外賣後請工人姐姐煮吓意粉撈埋食就得！」

陶枳樽狂擦最愛的蛋黃哥點心。

提起公仔精品，Crz自認公仔發燒友，透露曾特意飛到台灣掃貨：「其實蛋黃哥一出道就令我陷入瘋狂，佢未紅到嚟香港前喺台灣好受歡迎，所以當時我特登飛過去買咗好多杯杯碟碟，連佢同便利店Crossover嘅公仔都儲起晒，買埋座墊同梳化仔！」問到為收藏公仔精品花費多少？她笑說：「大概幾千蚊，我會盡量控制自己唔買超過四位數。我淨係講緊蛋黃哥，未計買埋其他公仔，哈哈！」