林雅詩疑鎅手睇急症諗過跳樓
左手手腕離奇受傷的前落選港姐林雅詩，昨日凌晨突然現身醫院，因她曾在微博上載鎅手相及留言透露有自殺念頭，即引來自殘入院的揣測！她昨日聲淚俱下，爆喊表示被屈有新歡有損其清白，情緒大受困擾外，更承認與丈夫婚姻曾出現問題。
昨日凌晨三時許，手腕纏着紗布的林雅詩現身醫院。
林雅詩自爆與老公曾頻頻嗌交，更諗過離婚。
近期復出拍寫真的林雅詩，承認壓力爆煲，要靠安眠藥入睡。
昨日凌晨三時許，林雅詩（Grace）在助手表哥Eric陪同下，突然現身九龍聖德肋撒醫院，素顏的她左手手腕纏着紗布，精神欠佳。其實早前Grace出席活動時已見其左手手腕包紮着，但未有清楚解釋受傷原因。原來她曾在微博多次表達不快，多次以「很辛苦」來形容，情緒起伏甚大，更上載鎅手相！同時近日宣布復出的Grace，被指婚姻現暗湧，包括與老公溫文英分房瞓多年，以及有指其表哥助手為新歡等。
靠安眠藥入睡
昨日Grace接受本報電話訪問透露，因做家務再令傷口爆開：「之前煮嘢食批薯仔已經整親手，我份人又唔錫身，自己落手落腳做家務又唔睇住傷口，結果流血，搞到成4點幾先走，醫生幫我打咗支止痛針同開咗啲藥畀我。（因為打交？）唔係！唔係你哋所諗咁樣。」Grace坦言近日復出承受不少壓力，以致飲食失衡及休息時間不足，因有報道針對其婚姻狀況，更指她暗交助手表哥Eric，對此Grace爆喊：「一個女人咁嘅年紀想有番自己事業，但竟然不斷有新聞去抹黑我，我都只係想開開心心出本寫真，用嚟喺內地發展，其實真係好影響我！嗰個係我表哥，依家做我經理人，幫我接工作，媽咪知我復出唔容易，所以就叫表哥幫我，搵個人可以保護我，媽咪覺得表哥點可能會傳緋聞，媽咪會放心好多。」
雖然Grace承受不少壓力，要靠安眠藥入睡，但坦言沒有患情緒病：「真係好大壓力，之前我會跑步減壓，但依家只想喺屋企。夜晚都靠食安眠藥先瞓到，我知係唔應該但真係冇計。」又稱壓力除來自輿論外，亦源於家庭：「老公見我呢排咁多新聞，都已經有啲說話，話太勁，因為佢份人好低調。」
與老公頻頻嗌交
過往數年間Grace不時在微博大吐苦水，多次以「很辛苦」形容自己，並表示曾有輕生念頭：「你是想見到我自殺定跳樓」，更上載（界刂）手照，她澄清照片絕非本人：「嗰段時間我唔開心，因為丈夫處於事業嘅高峰期，冇咩時間理我，連坐低食飯時間都冇。我又同佢嗌交，我為屋企付出咁多，但佢唔欣賞我，所以我用文字抒發情緒。（鎅手相係你？）張相係我喺網上Cap出嚟，嗰陣想用嚟嚇老公，我有諗過離婚，想佢關心我，但我哋之間冇第三者！（依家關係點？）今年關係已經好好多。（咁你有冇鎅手？）冇，我要照顧小朋友，唔會咁樣去傷害自己。」
至於其表哥Eric指Grace近日承受不少壓力，雖然突然傳緋聞，但強調兩人清白：「正常人冇做嘢咁耐，再做番嘢都會有壓力！（咁你會唔會避忌？）唔會，繼續幫佢接Job！」
文、攝：專案組
