屢傳不和的陳展鵬與洪永城（Tony）昨日出席新劇宣傳，展鵬即場向Tony下戰書：「佢咁招積，我想打佢！」Tony則揚言會練定功夫恭候，火花四射！

陳展鵬拗手瓜時表情輕鬆，相反洪永城似乎有啲緊張噃！

陳凱琳作狀人工呼吸，點知被洪永城「猴擒」攬實！

陳展鵬、洪永城、陳凱琳（Grace）及傅嘉莉等昨日以《張保仔》造型谷劇，展鵬在台上連番狙擊Tony，指他玩遊戲時猴擒將Grace攬入懷：「戲入面係咁，現場都咁，人哋爹哋媽咪喺度o架！」

被推上岸冇得撈？

展鵬受訪時「爆發」稱想打Tony：「我想打佢！係真打，佢咁招積，過多幾個禮拜就打！（台上畀說話Tony聽？）唔係，跟番佢講嘢個Tone啫，佢都叫我鵬叔！（嬲？）唔嬲，我個姪都咁叫我！（當Tony係姪？）佢本來叫我鵬哥，但呢行鵬哥得盧海鵬一個，佢就叫我鵬叔。（拗手瓜讓佢？）我係前輩，玩吓啫，多啲後浪出現好，最好推到我上岸，咁我就唔使做。（教Tony做戲？）佢使乜我教？如果咁都吸收唔到好難再上，佢嚟緊都做主角喇！」

而Tony得悉展鵬下戰書後即說：「好呀！我練定大聖劈掛迎接佢。（台上互窒？）有咩？搞氣氛啫！（佢教你做戲？）有！畀好多意見我，佢資深，我唔識都問佢。（你叫佢做阿叔？）我叫佢鵬鵬，佢叫我城城！演技梗係佢好，因為佢綜藝節目唔夠我嚟！（猴擒Grace唔怕鄭嘉穎嬲？）點會呀？佢都唔小器！」而Grace不覺陳洪不和，認為只是搞氣氛，提到被Tony「猴擒」，會否怕男友嘉穎呷醋？她說：「宣傳啫！」而傅嘉莉則透露劇中經常被展鵬恰，但從中得益不淺。

口花花係佢特色

此外，林子善與譚凱琪昨日拍攝陳展鵬主演的新劇《城寨英雄》，被問到陳洪不和時說：「我問過展鵬，佢話冇嘢，仲好撐Tony，我話Tony同記者咁講嘢口花花喎，展鵬話呢個係Tony嘅特色，其實識得展鵬都知佢好人，EQ高，同佢拍嘢好舒服。」

文：影視組