叱咤八十年代的英國著名新浪漫樂隊Spandau Ballet，前晚首度在香港亞洲國際博覽館開騷，亦是他們為期兩年的世界巡迴演唱會的最後一站，吸引香港歌手呂方帶埋女友一齊欣賞！

Spandau Ballet熱情高歌，令粉絲非常Hyper！

呂方帶埋女友睇騷，卻尷尬到暈不願合照。

樂隊Spandau Ballet自1984年來港拍攝MV《Highly Strung》後，相隔三十年再來香港，吸引一眾本地藝人包括陳浩民、杜德偉夫婦、雷頌德、黃家強夫婦、伍詠薇、蔡一傑、黃耀明及呂方等捧場。而自認是忠實Fans的蔡一傑在演唱會上不時高舉Spandau Ballet的黑膠唱片，主音Tony Hadley見狀亦豎起拇指回應。而伍姑娘全程邊唱邊跳舞，相當投入。

扭擰拒合照

而帶同女友睇騷的呂方全程表現避忌，不想與女友合照，問到是否很熟悉Spandau Ballet？呂方說：「我唔係好熟佢哋啲歌。（女友呢？）女友唔識佢啲歌。（所以賣甩佢嚟？）唔係，成班朋友咋嘛。（女友都有嚟？）有呀！有呀！有呀！」昨日記者再度致電，惟呂方似乎想低調談感情事，多次拒認女友身份，他說：「朋友啫，好好嘅朋友。（有冇機會發展？）有嘅。（介紹畀傳媒識啦！）有機會先啦！」

快閃觀眾席

Spandau Ballet先以《Soul Boy》打頭陣，之後唱出香港樂迷最熟悉的幾首名曲《Highly Strung》及《Only When You Leave 》等，將氣氛推至高峰！年過半百的Tony穿着西裝西褲又唱又跳，除了不時飲水抹汗及大呻好熱外，唱至半場時更索性飲樽裝啤酒降溫！其後Tony與Gary突然在台上失蹤，之後又現身在後排觀眾席表演，給樂迷意外驚喜！謝幕時，擔任色士風及敲擊樂手的Steve Norman更跳落台與觀眾握手！

文：外娛組