陳嘉桓被遺忘的時光

蛻變天鵝

陳嘉桓（Rose）笑言由小學起已是全班最高的一個，可惜天生膚色偏黑兼不懂打扮，絕對稱不上「起眼」：「小學時女同學櫃桶總會收到男同學送嘅畫，但我偏偏冇，自此我就知道我唔係受垂青同突出嘅一個，細個邊識話去扮靚、化妝？最多鍾意粉紅色就買好多粉紅色嘅嘢，但依家時代唔同咗，資訊好發達，啲女仔細細個就識得襯衫出街。」

直到中學，她才懂得上網學扮靚及襯衫：「我十四歲開始就做模特兒，當時有屋企人做職業化妝，又識得同我整指甲，仲記得讀書時整咗指甲，返學就用膠布包住，嗰時都好貪靚，放假整指甲，又會買直髮夾，會夾直晒啲頭髮先返學，又會買唔同顏色嘅橡筋束起啲頭髮。」她又指童年時皮膚偏黑，加上長得比同年齡的同學高大，故在同學面前有點「怪怪」，當踏入中學懂得扮靚後，自信心立即大增！

Rose每次出席公開活動都總是至靚至Fit，原來她自有一套心得！飲食方面，她選擇吃清淡的食物：「平時主要以沙律為主餐，其實自己樣樣都食，但要懂得平衡同節制。另外，每日要保持適量運動，我有做開瑜伽、跑步，因為可以保持新陳代謝節奏。而飲水同食生果就必須充足，可以保持身體水分同維他命，對皮膚質素好有幫助！」喜歡曬太陽的她，建議避免在中午時分曬太陽，若在陽光最猛烈的時候曬，可多塗適當度數的太陽油，而事後一定要塗蘆薈保濕，令膚色更均勻。

進化打女

踏入娛樂圈後，Rose得到師傅冼國林提攜，以打女形象殺入電影圈，她笑言除了工作要打功夫外，有時連客串性質的戲都要她打功夫，甚至拍廣告都要打，認真入屋！

對於一同出道的師兄杜宇航早已離開公司，兩師兄妹「分手」收場，幸好對她的發展影響不大，她說：「師兄走咗係少咗個伴，但其實又唔係好大影響，因為公司最近簽咗新師弟師妹，我都覺得有啲受寵若驚，自己年紀仲細，唔係好習慣畀人叫師姐，公司發展多咗，藝人又多咗，好似一個開心嘅大家庭。感激公司同冼師傅畀咗好多機會我哋，依家公司有發展電影，內地又有影視城，拍攝部分我哋都有份參與，好榮幸！」

轉新戲路

Rose在圈中有不少好友，黃日華女兒黃芷晴可算最交心：「我哋合作電影《販賣愛》而認識，因為大家鍾意嘅嘢好接近，加上大家都係少女系，有共同話題。佢係以星二代身份出道，而我就好細個入行，大家可以分享入行後遇過嘅問題。」拍過不少電影的她，在電影《販賣愛》及《男人唔可以窮》中都與過往的動作戲不同，她坦言是一個新嘗試。除了電影工作，她亦不時擔任旅遊節目的嘉賓主持，成為旅遊達人：「入行後推出過旅遊書，又去過好多地方，絕對歡迎呢個方式嘅工作，去過韓國、泰國、台灣、馬來西亞、日本、巴黎同倫敦等地，其實都想孭背包去歐洲坐火車四圍去，最想去新天鵝堡，係我下一個目標！」

後記：靠畫畫減壓

熱愛畫畫的Rose畫功絕對出色！她憶述細細個已報Course學畫畫：「畫畫由讀幼稚園開始就接觸，記得細個屋企人帶我去琴行學彈琴，但我真係冇乜興趣，最終過咗隔籬間舖學畫畫，就咁培養出興趣。之後讀書時啲作品都有貼堂、攞獎，好有滿足感，知道自己有呢個天分同方向發展。」她又表示畫畫可以減壓，近日更買了塗色畫冊作減壓工具。她又直言自小收集了很多個人作品，希望有機會舉辦畫展，透過作品與大家分享她的內心世界。

文：影視組