前香港小姐季軍何艷娟過去一年以擔任主持工作為主，為了裝備自己，她最近自行秘密練兵，跟隨著名演藝老師甄詠蓓學習演戲，向來斯文的她指最大挑戰是要在人前爆粗：「老師讚我，冇諗過我會做得咁癲、咁放。」

何艷娟最近跟甄詠蓓學習演戲，秘密練兵裝備自己。

何艷娟希望盡快有機會拍劇，最想與王祖藍合作。

剛卸任的前香港小姐季軍何艷娟口才了得，在任期一年內除履行港姐工作外，還被無綫安排擔任主持工作，主持過的節目包括《民峰而至》及《港生活．港享受》等，她說：「好鍾意做主持，特別係《港生活．港享受》，可以學到好多嘢，嚟緊都想試吓主持飲食節目，可以輕鬆啲，爆吓肚，考吓即時反應。」

甄詠蓓讚夠放

展望未來演藝事業的何艷娟希望有機會嘗試拍劇，面對競爭激烈的環境，她近期「秘密練兵」跟隨甄詠蓓學習演戲，她說：「自己唔係讀演戲出身，知道要喺呢行發展就要充實自己，上咗甄老師嘅課程個幾月，愈上對演戲愈有興趣，可能自己鍾意挑戰，上堂好有挑戰性，好似老師會要你喺一大班人面前扮貓、扮自閉症患者，要靠幻想、想像力去做，可以訓練到演員需要有嘅想像力，最大挑戰係要喺廿幾人面前演戲，初時都尷尬，後來豁出去，老師都讚我，以為我係港姐出身，冇諗過我可以咁癲，話我識得放開、豁出去演戲。」

增值學K-Pop

平日斯斯文文的何艷娟口才了得，但跟甄詠蓓學習演戲要講粗口，就令她有口難言！她說：「最難係要講粗口，平時唔講粗口，覺得不雅，好尷尬，咁多人望住，後來都克服咗。」除了演戲，她還深造跳舞，學習爵士舞及時興的K-Pop，她說：「入行好快已經一年，要努力裝備自己，每個人都有自己魅力，要不停增值、充實自己，搵出自己優點去放大，成為一個有內涵嘅人，雖然好多時都係睇外表先，但係諗法、價值觀先係吸引人嘅地方，希望好快有機會試吓拍劇，睇吓辛苦上堂嘅成果。」