胡定欣期待「執到寶」

藝人胡定欣及陳展鵬昨日為文偉鴻監製的無綫劇《城寨英雄》開工，穿上緊身黑衣裝的定欣，埋位時胸前拉鏈再向下拉，既有型又性感，她說：「套衫度身訂造，我好鍾意，但由造型到依家，我瘦咗幾kg，呢個劇我好多一個鏡頭做幾個動作嘅戲，之前拍翻觔斗墊唔到Pad，手臂瘀晒。」她表示會參演新版《執到寶》，並期待與歐陽震華、羅蘭及胡楓等前輩合作。而展鵬則自爆「打到瘦」：「瘦咗5、6磅。（傳與洪永城不和？）傳聞傷害唔到我哋感情，傳大鑊啲都仲得！（佢話你要檢討？）我直頭要檢討，只要宣傳傷害唔到人，我OK！」