陳豪昨日出席活動時談到太太陳茵媺復出拍戲，他表示會永遠支持，但又想太太能多點時間陪伴囝囝，心情可謂相當矛盾。

陳豪同時要兼顧作為「老公」、「父親」及「粉絲」的心情，真係唔容易！

黃紫盈悉心打扮出席活動。

陳豪與一眾嘉賓齊齊祝酒。

陳豪昨日與黃紫盈出席於東方表行舉行的CASIO 「Challenge Spirit of G-SHOCK」新品發布會，提到陳茵媺（Aimee）正在馬來西亞拍劇，問到有多久沒見太太？他說：「我哋每日都有視像見面。（中秋要分兩邊過？）係呀！（Aimee掛住小朋友？）佢一直未出嚟做嘢就係因為掛住啲小朋友，今次去嘅時間唔係太長，眨吓眼就返嚟，OK嘅，畀佢過吓戲癮。（時間長就唔畀？）我冇所謂，永遠支持佢，不過佢自己都應該會唔捨得啲小朋友。」

考慮粉絲心情

雖然陳豪表示會支持太太拍戲，但問到可會叫太太一起留在TVB時，他說：「幾難答，我係一個父親，作為爹哋當然想媽咪陪多啲小朋友，相處時間多啲。但作為一個Fans就會想佢拍戲，要搵到平衡。」可見他心裏是希望太太能多陪囝囝，心情矛盾。

冧老婆唔面紅

提到與TVB的合約時，他說：「仲有好長約。（加簽咗好長？）我嘅合約都唔短。（有冇再加簽？）冇冇冇。（冇得同太太一齊唔續約？）我續咗好耐。太太一路喺我身邊，我同佢已經成為一體，一家人嚟嘛！（唔面紅？）再問我就面青。（有冇聽過樂視霍視都會開劇？）都聽到好多呢啲新聞，講到尾作為演員，如果合作得好開心，冇離開嘅需要。（如果酬勞好？）錢唔係唔重要，但最重要係發展前景。」

文：名人組