呂慧儀昨日到鑽石山荷里活廣場出席中秋節活動，提起湯盈盈與錢嘉樂再添B女，她說：「恭喜佢！我都鍾意女，個仔見到我出門口就好開心，見到爸爸走就喊晒，我都想要個女，可以同媽媽傾心事。順其自然，暫時做嘢賺錢先。（送禮物畀盈盈？）會呀！等我諗吓送乜。（傾吓湊BB心得？）我老公同嘉樂就成日傾湊仔經，依家啲男人好犀利，乜都識。」

呂慧儀出席中秋節活動，笑言被囝囝搞到暈陀陀。

被老公傳染而患病的她又說：「老公病咗，雖然已經分房瞓都中招。餵人奶好耐冇食成藥，成日都暈陀陀。（囝囝一歲仲食緊人奶？）係呀，開劇冇得食，盡我能力，依家都諗緊將多出嚟嘅人奶做人奶番梘，畀個仔第時皮膚有問題時可以用。我係個變態媽媽，為BB安全寧願研究親手整。（搵緊學校？）唔會報太多間，揀三間近屋企。（訓練面試？）冇，一歲都做唔到乜，可能同佢傾多啲偈。」