天后容祖兒與李克勤的演唱會前晚於紅館落幕，為滿足熱情的歌迷，二人唱到超時，更被罰廿萬，但仍霸氣地表示不後悔！談到男友劉浩龍有露面捧場時，祖兒甜爆表示只要男友有時間都會來支持！

十二場演出圓滿結束，克勤與祖兒完騷後即切蛋糕慶祝。

祖兒與克勤的演唱會來到尾場，除了劉浩龍，還吸引不少圈中人捧場。

祖兒、張敬軒、克勤

吳君如投入睇騷。

十二場的《容祖兒李克勤演唱會2015》前晚尾場，吸引吳雨、容媽媽、張敬軒、古巨基、佘詩曼、陳百祥與黃杏秀、吳君如及蘇永康等群星捧場外，「匿埋」了十一場的劉浩龍（師兄）終出現在控制台明撐女友。落力演出期間，祖兒因舞台滑幾乎跣親，而克勤則於握手環節時被歌迷用力拉住而差點向前仆，幸有驚無險！二人一口氣唱足個多小時才開始聊天，克勤笑指演唱會每分鐘都在燃燒金錢，並笑言要把演唱會上的水晶燈拿回家，祖兒即指屋企不夠克勤的大，克勤卻反擊指她是樓王，場面搞笑。

難得聽到真心話

克勤談到早年出席頒獎禮，當時與祖兒只是點頭之交：「祖兒突然擰個頭嚟問：『我個妝得唔得？』身為一個男士畀人咁問，好大感觸，覺得佢對我信任，而且佢係一個冇機心嘅人。」之後祖兒談到綵排時曾被克勤指她唱《飛花》未達水準，令她感受深刻：「難得有個人肯話（真話）我聽！其實嗰晚係瞓唔着，半夢半醒仲係聽緊《飛花》，最後有場你話我唱得好，我好開心！」二人又在台上依依不捨，並希望能合作再次開騷，最後Encore到凌晨12時許才正式完場。

拒美加巡迴「舞龍」

騷後二人切蛋糕慶功，談到因演出超時要罰20萬元，他們坦言未試過唱到那麼夜，克勤表示其實還有很多歌未唱，並霸氣地說：「我哋一啲悔意都冇！」問到會否用歌酬找數？二人齊聲說：「佢就想！」

提到男友捧場，祖兒表示看不到對方，問到可會想男友上台獻唱？她甜笑表示不用：「咁樣支持最好。（佢場場都嚟？）有時間都有嘅。」稍後克勤與祖兒將到內地和美加等地巡唱，新年則到拉斯維加斯巡唱，當記者問可會帶「巨龍」去「舞龍」時？祖兒笑說：「外國唔興！」至於談到最近甩拖的蔡卓妍，祖兒表示做朋友永遠會在心中支持。

文：音樂組　

攝：司徒國榮