錢嘉樂嬌妻湯盈盈再添一女!盈盈昨日凌晨順產誕下重6磅15安士二女Kassidy!又做老竇的嘉樂更自爆「極速生女」過程,憶述被作動的盈盈踢醒,火速拎起「走佬袋」,到「飛車」送太太往醫院分娩經過,盈盈神速以45分鐘誕下囡囡,全程僅用1小時17分鐘!談到Kassidy似誰?嘉樂即笑言「似家姐!」深怕盈盈知道細女似埋爸爸條氣唔順!

錢嘉樂抱大女探完老婆及細女後,兩父女開心到笑住走。

湯盈盈與錢嘉樂再添一女,梗係Happy啦!(資料圖片)

大女拿着「妹妹送的禮物」嗲到爆,又要老竇錢嘉樂錫番!

梁靖琪與錢嘉樂結伴探湯盈盈。

錢嘉樂在記者會上分享誕女喜悅,舉起V字勝利手勢!

受訪時,錢嘉樂難掩喜悅!

現年40歲的湯盈盈繼兩年前誕下大女錢凱晴(Alyssa)後,昨日凌晨再為50歲的錢嘉樂順產誕下6磅15安士的二女Kassidy,成功三年抱兩!好友阮兆祥昨晨在電台節目大爆盈盈已誕下第二胎,公布喜訊。

再為人父的嘉樂昨午以主席身份出席香港動作特技演員公會活動,西裝骨骨的他全程笑容滿面。提到老婆盈盈為他再添一女,他自爆「極速」生女過程:「我畀老婆踢醒,嗰時就問佢係咪真?佢話好似係真!」然後立即刷牙洗面再換衫,以9秒9速度手執「走佬袋」再飛車由北角寓所送抵舊山頂道嘉諾撒醫院,並急Call醫生及麻醉師。他表示全程陪太太入產房,並不斷着盈盈加油,第二次剪臍帶的他更被醫生讚熟手:「由踢我起身嗰下到生出嚟全程1個鐘零17分鐘,入產房45分鐘左右就順產咗,佢鍾意自然分娩。」

驚唔順氣「細女似家姐」

因公會昨午舉行記者會,嘉樂父愛爆棚讚細女Kassidy又叻又聽話,笑指記者會才不用移師醫院舉行:「個女咁啱凌晨出咗世,我仲可以瞓陣先嚟。自己套戲又煞科,撞埋一齊就唔知點算,因為之前話會早產,心諗唔會23號咁啱啩,點知真係!」問到誰為細女取名Kassidy?嘉樂自嘲:「太太好體諒我,改咗啲名畀我睇吓讀唔讀到,讀唔到佢就話『咁唔用呢個喇,你都讀唔到』。」但中文名未決定,或會交由爺爺改:「睇吓會唔會跟個凱字。」

對於大女Alyssa跟他餅印一樣,問到細女似爸爸還是媽媽?嘉樂笑說:「我就梗係覺得似我啦!不過媽媽話今次個女唔似佢條氣會唔順!妹妹似家姐啦!」至於會否送禮物給盈盈作獎勵,他說:「未知呀!(鑽石、樓?)啲樓都入晒佢名啦!都冇分喇!冇所謂!好多謝老婆送咗兩份大禮畀我,我好珍惜呢3個女人,尤其係太太佢好勇敢,由屋企落樓到入產房都係自己行!(諗住再生?)睇太太啦!自己諗住停一停,屋企連埋外傭有4個女人喇!」他又爆盈盈感動落淚:「我上次有,今次就冇,因為好緊張。」兩公婆選擇在前年誕下大女的嘉諾撒醫院,連醫生費及其他雜費約花十萬元。

醫院探完母女笑住走

活動司儀崔建邦在台上恭喜嘉樂「雙喜臨門」,他接受祝賀時說:「今日發生好多嘢,依家心情都未定,志偉哥仲笑我呢個記者會係為我而設。」適逢公會的專業演員培訓課程亦在昨日啟動,他即自言同日做兩次老竇,眼見一班新星在台上耍拳,他笑說:「今日做咗老竇,冇衝動好似頭先班後生仔咁耍拳。」

昨晚8時,嘉樂抱住大女Alyssa與湯盈盈父母一同離開醫院。Alyssa手拿玩具,嘉樂表示玩具是妹妹送的禮物:「個妹送畀佢,佢好受落,但係家姐有啲咳,唔畀佢咁親近阿妹。(Alyssa見到阿妹有咩反應?)佢望一望阿妹,又望一望份禮物,佢揀咗份禮物,不過都有話阿妹好得意。同埋佢見到媽咪都好開心,佢好Miss(掛住)阿媽,成日問媽咪去咗邊。」Alyssa全程嗲爆喪啜錢嘉樂,他笑說:「好難得!平時媽咪大晒!」他又指盈盈精神不錯:「有啲攰但胃口好好,媽咪(外母)整咗兩碗炒飯都食晒,佢仲自己餵奶,醫生就提議住多兩晚先走。」

採:影視組

文:專案組