張致恒指睇《東網》才知道消息，事前沒有察覺異樣：阿Sa係個好聰明嘅女仔，如果佢唔想畀人知係冇人會知。自己好樂觀，如果有負面嘅輿論都唔會理。

洪卓立體諒Sa霆因女友湯怡都捱過鬧：最嬲係有次湯怡拍劇後話佢飛起我，我就同公司講要公開，最心痛係見到佢畀人鬧！

馮允謙：上次澳門見到佢哋喺後台幾有火花、幾Sweet，William表演嗰陣阿Sa都跟住跳，可能佢去咗內地發展，冇咁多時間，雖然分咗手，但話唔定有第二次嘛！

曾與阿Sa傳緋聞的歌手馬天佑：我睇新聞先知有啲嚇親。（慰問？）算係慰問咗，但我冇問細節，只係畀佢知道發生咩事都好，精神上都支持佢。

林欣彤：好可惜！自己都經歷過分手，覺得唔應該Focus喺分開，而應該Focus喺大家曾經一齊開心過，彼此令對方成長，我會祝福佢哋。

王宗堯：我有睇報道，都幾得意，情侶要公開宣布分手，但希望佢哋唔係宣傳！如果感情認真就唔應該隨便講分手，講得多會變真，但都會祝福佢哋。

趙頌茹：祝福佢哋無論感情同做嘢都好，亦如自己一樣，喺等待過程中學習，同埋上天安排一個真命天子、天女出現。

鄭欣宜：唔啱咪分開，無謂嘥時間，但都希望佢哋各自搵到個自己鍾意同錫自己嘅人。（有傳係宣傳！）係咩？唔知呀！唔會玩到咁大啩！