千里馬需有伯樂發掘，在娛樂圈發展機遇很重要，然而前港姐周美欣有感是圈中黑仔王，準備去韓國當組合歌手卻遇上「新沙士」令計劃要擱置，簽約唱片公司又遲遲未能出唱片，然而她未有放棄，繼續尋找機會，相信總有一天能突圍而出。

Lorretta演技獲得讚賞，但身高卻令她錯失不少拍戲的機會。

Lorretta跟唱片公司的合約已滿，自行接Job收入更可觀。

Lorretta（中）拍過幾部戲，但都是配角角色。

Lorretta曾參選港姐並得到季軍。

Lorretta獲邀到韓國發展卻遇上「新沙士」襲韓而叫停。

曾任模特兒的Lorretta身材高挑，長腿夠晒吸引。

前港姐周美欣（Lorretta）早前參加亞洲版的Top Model真人Show，繼而被邀請到韓國做組合歌手，一向熱愛唱歌的Lorretta有感機會到來，萬事準備就緒之際，突然「新沙士」襲韓國，令計劃被擱置。以為再錯失機會，香港有公司聯絡Lorretta，有意簽她，更有機會到國外拍戲，她說：「韓國嗰邊等唔切就算，本身First Choice係韓國嗰邊，但等之時都會同香港嗰邊傾。」

「百足咁多爪」的Lorretta既識唱歌又能演戲，自問比較貪心的她坦言鍾意唱歌多點，但亦不想放棄拍戲：「拍完TVB劇之後覺得太好玩啦，同埋有人讚呢，信心係多咗。最近拍完法國微電影，法國人都有讚，但我覺得進步空間仲有好多，仲係好嫩。」

天生係主角

但身材高挑的Lorretta坦言身高令她錯失不少拍電影的機會，她說：「最近我都Cast咗杜琪峯嘅戲，佢初初搵護士，但係我太高，望落去會好覺眼。」

Lorretta安慰自己，認為未嘗不是好事：「其實咁樣都好，會幫我Cut走好多行行企企嘅角色。」問到會否考慮離開香港發展？她笑說：「呢排有呢個諗法，諗係咪香港人鍾意啲細細粒啲？我係完全相反，我少少似啲鬼妹，去Event見到啲外國設計師，唔知點解佢哋會係咁黐住我。」

冇約賺更多

較早前Lorretta與唱片公司完約後，現已冇約在身，問到會否有感娛樂圈的路更難行？她反而覺得機會多過以前，收入更可觀，除了四方八面的公司邀請外，更有朋友介紹工作，她說：「Freelance最多錢搵，我FB又會放Email，啲人有嘢做就會搵我。」至於會否揀外國人當男朋友？Lorretta就堅決Say No：「我鍾意啲又識中文又識英文，要好似我咁。」在愛情上，她顯然很有要求：「如果你表白之後，我唔覺你煩就有機會，但一定要做朋友先。之前試過有人追我追咗兩個月，之後又唔追，之後又追番，咁就算啦。」

男人壞女人不愛

Lorretta有Model的身高，更曾是港姐季軍，但佢自爆拍拖次數唔多，因曾經信錯人，她說：「我17歲時，有個朋友追緊我，咁我本身好憎人食煙，咁啱佢又係食煙。有日佢走嚟同我講『醫生話我個肺穿咗個窿，得番半年命』做朋友嘅我當然係喊晒口，之後佢話『我就嚟生日，生日嘅時候未試過有女朋友陪嘅感覺，你可唔可以拖我隻手，畀我有女朋友Feel。』我當時應承咗佢，到佢話就嚟死嘅時候冇死到先知佢呃我。」

文：名人組　

攝：吳文聰