23歲的模特兒林莉嫻早前成為《東網Baby》「夏日心動」系列女主角，隨即被王晶睇中招為「晶女郎」，並視為秘密武器出任新片《鴨王2》的女主角，更率先被安排與周潤發合作！身為《鴨》片男主角的何浩文亦對Leslie讚不絕口：「正過袁嘉敏好多！」

樣靚身材正的Leslie眼神懾人，難怪獲王晶羅致旗下！

「鴨王」何浩文將在《鴨王2》中與Leslie鬥戲。

年僅23歲的Leslie視拍戲為人生體驗，大把「錢」途！

袁嘉敏在《鴨》片中全裸露點，但仍然被飛出續集。

姓名：林莉嫻（Leslie）
年齡：23歲
三圍：33B、24、36
身高：1米76
入行經過：前身為模特兒的Leslie，今年6月成為《東網Baby》夏日心動系列女主角之一，之後被導演王晶睇中，羅致旗下成為新一代晶女郎。

姓名：袁嘉敏（Candy）
年齡：30歲
三圍：33D、23、34
身高：1米68
入行經過：參選2009年香港小姐競選並奪得「最上鏡小姐」，之後加入無綫擔任主持及拍戲，其後她在2013年離開無綫恢復自由身。

採、文：影視組、專案組

由東網推出的《東網Baby》盡攬全城性感尤物，推出以來大受歡迎，現年23歲的模特兒林莉嫻（Leslie）早前成為《東網Baby》「夏日心動」系列的女主角後，旋即被向來點石成金的王晶睇中，並成為「晶女郎」之一！昨日王晶在微博以「秘密武器」來形容Leslie，並宣布她將主演其監製的新片《鴨王2》！

何浩文搶閘抄牌

由何浩文及袁嘉敏主演的電影《鴨王》今年初上映時票房收逾千萬元，並將在下月開拍續集《鴨王2》，惟首集的袁嘉敏被飛出局，由「鴨王」何浩文大戰兩位晶女郎Leslie及文凱玲！昨日Leslie接受本報電話訪問時說：「非常意外同開心！因為晶哥係喜劇天王，拍呢部戲都唔會好大壓力，當係人生體驗！如果要好性感都冇問題，但係全裸就要考慮。（擔心同袁嘉敏比較？）唔怕，大家路線唔同！」而Leslie的另一「驚喜」，就是獲安排在《賭城風雲III》客串，並與周潤發碰頭！她說：「拍完後同發哥、晶哥同枱食飯，全程我一句說話都冇講，緊張到搣到隻手損晒，發夢都冇諗過會同佢哋同枱食飯！」

袁嘉敏：祝佢順利

而王晶接受本報電話訪問時，承認看過Leslie的《東網Baby》專輯後，有感其樣貌及身材不錯，雙方一拍即合：「佢簽咗我一、兩個月，佢同我簽嘅係影視合約，年期唔短，係合理嘅新人價。出年陸續好多戲開，都會預佢。呢部戲係IIB級，所以性感同大膽程度，意識上好似電影《喜愛夜蒲》咁。」另外，身為男主角的何浩文自爆已向Leslie抄牌：「佢身材好又夠高，又夠後生，梗係正過袁嘉敏好多啦！以前同文凱玲都有合作過，所以我同佢哋就算拍情慾戲都唔會尷尬，我係專業演員，識得抽離！」

而在首集全裸露點上陣、但續集被飛出局的袁嘉敏，昨日在電話中表示沒有不快，暫時亦不想演喜劇及妓女，對於Leslie被視為秘密武器，她說：「我唔識佢，不過男同女睇女仔角度唔同，有時唔覺佢（王晶）鍾意啲嘢有幾好，祝佢拍攝順利啦！」

此外，袁嘉敏昨晚出席電影節活動時透露，正忙於籌備寫真及散文，文章主要記載她的成長過程，她笑言曾想入服裝間偷看黃子華裸體，她打算在澳洲沙漠全裸拍攝寫真，並於明年春天推出。