天后容祖兒與李克勤合體舉行一連十二場的《容祖兒李克勤演唱會》本月11日開鑼，前晚兩人排舞作最後衝刺，更大晒苦練成果，其中積極操弗的祖兒更以白Tee透螢光Sport Bra出現，祖兒笑言每次到克勤與女舞蹈員跳辣身舞的部分，都買定花生等睇戲，問到兩人跳辣身舞前可有向另一半備案？克勤竟作出「報復」，大爆祖兒平日會與「龍」練舞：「我只知祖兒話我聽，我唔o係香港o個陣，搵條『龍』陪佢練。」暗指祖兒的男友劉浩龍是練舞對象，祖兒聞言即撒嬌：「搞錯呀！咁冇雷（義氣）！有o的舞蹈要100次去練，所以先要返屋企練。」

克勤前晚排舞時爆料，指祖兒平日會與男友劉浩龍練舞。

大騷麒麟臂的克勤與祖兒作狀拗手瓜，七情上面。

羨慕食極唔肥

談到祖兒明顯瘦了很多，克勤大爆她瘦到只有80磅仍想減肥，再瘦下去歌迷必定心痛，祖兒則封克勤是「魔鬼」，經常誘惑她吃東西：「好羨慕，我唯一見過兩個人開騷前唔使戒食，蔡卓妍開騷前可以狂食，克勤就係第二個。」克勤又提到舞蹈其中一個動作是由他橫抱祖兒，初初練習時試過失手：「依家唔會，佢輕o左好多，我又大隻o左o的。」

除積極健身，克勤還留了一行Man爆的鬍鬚，不過暫未決定演唱會當日會否繼續留鬚，反而祖兒對留鬚「蠢蠢欲動」：「我都想留，因為框住塊面，塊面會瘦好多，我想留一條，好似京劇咁。」當記者笑指她有「留」浩龍時，祖兒即大笑說：「嘩！你好好笑呀，哈哈哈！」