【鄭家俊、嚴偉國澳門直擊】舞台王者郭富城率先登陸澳門全新開幕的新濠影滙綜藝館打響頭炮，將於11月舉行特別版演唱會，是次演唱會悉心打造的夢幻舞台，讓城城跟歌迷可以作零距離的互動。城城表示以往在演唱會中跟歌迷握手時都因歌迷太熱情而受傷，令他的手留下愛的抓痕！

城城將於11月打頭陣在「新濠影滙綜藝館」的夢幻舞台開騷。

城城否認戴婚戒，但坦言喜歡小朋友，更不排除會閃婚。

城城即席起舞，展現舞台王者風範。

城城與新濠博亞娛樂有限公司高層余耀雄舉行祝酒儀式。

郭富城昨午親臨澳門為新濠影滙綜藝館的音樂季度啟動禮擔任嘉賓進行儀式，並宣布將於11月在綜藝館舉行特別版演唱會，打頭陣演出。大會為配合城城的舞台王者身份，特別為他設計夢幻舞台，讓他能與歌迷作夢幻距離的接觸。記者會上，城城即場表演幾個舞步，並聯同新濠博亞娛樂有限公司高層進行祝酒儀式，預祝演唱會大賣。

手上多愛的抓痕

城城表示演唱會中設立搖滾區，讓粉絲可跟他互動，一起跳舞：「呢個搖滾區係我個人演唱會從未試過，今次場館o既設施先做到，為配合演唱會，我(口既)設計舞台係為呢個場館打造，呢度o既設施同新科技先可以做到，天馬行空都支援到，係一個夢幻o既距離，做o的大家意想不到舞台效果，歌迷面前跳舞同唱歌，自己舞台上從未試過。（搖滾區容納到幾多人？）要等大會安排，個場館好似可以坐5千人。（拉粉絲上台？）都有機會，係近到從未出現過我舞台上。一直都想咁做，英美國際級舞台都唔容許咁做，會有限制，依家澳門打造到國際級舞台，同我想突破、破格同創新理念一致，所以佢搵我打頭陣時，我係一拍即合！（演唱會歷時幾長？）三個鐘，Rundown會重新度過，要配合舞台升降位、視覺效果等，係三面台，我都會參與開會，好多要重新打造。」

至於會否擔心有熱情粉絲攬或強吻你？城城說：「身為歌手都希望同歌迷互動，想佢透過我舞蹈同歌聲，感受我舞台力量。（驚畀粉絲抽水？）大會有工作人員控制以防突發事件，會有特別措施應付。之前我開演唱時有握手環節，試過畀歌迷捉實隻手唔放，仲要拉我埋去，咁大會都有請保安人員保護我，但握手時成日受傷，會被抓傷，希望大家錫住我，唔好抓傷我！我試過畀自己個咪撞親牙，依家去握手時識得將個咪放低，同埋用手包住個咪，咁撞都係撞到自己手指。我唔介意歌迷咁熱情，最驚係歌迷捉住我唔放手，拉我埋去，我唔想歌迷受傷。我隻手已經有愛的抓痕，習以為常喇！」

問到今次演唱會是否只舉行一場？城城說：「序幕，係呢個場館序幕，緊會有國際級巨星接我棒，我成為第一位華人歌手度打頭陣，好榮幸！今次係特別版演唱會，明年紅館個係另一個舞台同表演項目，今次係好珍貴演出。」

喜歡小朋友

城城左手無名指戴戒指，問到是否已婚？他說：「呢隻只係飾物，大家誤會喇！咁我轉去右手戴喇！（想成家立室？）希望成家立室同埋有小朋友，我好鍾意小朋友，但現階段我工作好繁重同好重要。我媽咪叫我抖吓，我叫佢放心，應該休息時我會休息。自己想有突破階段，努力創高峰，會繼續呢個理念。如果達到自己目標，同埋得到大家認同，就去到成家立室時候，都要花幾年時間，可能三年。如果現階段遇到姻緣，亦唔排除會閃婚，都希望得到大家祝福。」