王菀之前晚為首次出任主角的電影《沒女神探》謝票，期間自爆男友Eric So（蘇卓航）竟然未捧場睇戲！文：影視組

王菀之表示男友未睇新戲，遲吓先同佢二人世界一齊睇。

葉念琛（左起）、王菀之、陳嘉寶及林盛斌到戲院謝票，慶祝票房報捷。

王菀之出席預防乳癌活動，話唔怕做高齡產婦。

王菀之（Ivana）前晚與陳嘉寶（Anjaylia）、林盛斌（Bob）及監製葉念琛到旺角為新片《沒女神探》謝票，葉念琛稱讚首次擔任女主角的Ivana：「套戲開畫票房有8、90萬，我好開心，Ivana話我再搵佢，佢唔加價！」

肉緊Check票房

初挑大樑的Ivana則自爆：「我第一次咁重戲份，初初好擔心，有票房壓力，前日上網睇仲有好多綠色位未賣，今日（即前日）再睇，紅晒（售罄）喎，即刻打畀爹哋媽咪話：『有人買飛呀！』（決定唔加片酬？）諗過吓，今次最開心係感受到喜劇可以帶畀觀眾歡樂。（男友點評價？）佢未睇，我之前同咗唔同人睇，未排到佢，我想同佢睇正場，睇埋觀眾反應。」

Anjaylia遂建議：「不如包場同你男友一齊睇！」Ivana搞笑地說：「可唔可以唔好淨係同我男友睇呀？」嚇得Anjaylia以為自己失言，即時面紅更正：「我係想請你同你男友睇。」Ivana即打圓場說：「成班演員一齊睇啦！」

唔心急生仔

另外，Ivana昨日出席《乳癌風險BINGO－乳健教育社區推廣》活動，席上邀得專家講解患乳癌的風險。提及餵母乳時，Ivana積極提問，問到是否計劃生育，她笑言：「咁多風險入面，餵母乳我未試過，好新鮮同陌生。」並坦言身邊姊妹已成家立室，提到跟男友的結婚大計時，她說：「間唔中，結論係下次再傾。（未婚懷孕？）最好咪啦！（唔心急？）本身已經係高齡產婦，但醫學更昌明，大年紀都仲生到。」