導演錢國偉下月將與女友陳宛蔚在洲際酒店舉行婚禮，昨日陳宛蔚在微博晒喜帖分享喜悅，並透露婚禮豪花七位數，近日更緊張得失眠及甩頭髮，要靠狂食減壓。

下月拉埋天窗的Calinda和Wilson，以金色喜帖分享喜悅。

王陽明和蔡詩芸終修成正果，網友都戥佢哋開心！

文：影視組

導演錢國偉（Wilson）去年7月向曾任「天使妹」的女友陳宛蔚（Calinda）求婚成功，Calinda昨日凌晨在微博大晒金色的結婚喜帖，帖上印有兩人的英文名字頭，Calinda留言說：「Getting ready for our Big Day……Excited！（為我們的大日子做好準備，好刺激！）」Wilson亦在微博上載笑哈哈符號表達興奮的心情。

性感婚紗冇尺度

昨日Calinda接受電話訪問，她透露婚禮將於下月8日在洲際酒店舉行，筵開逾50席，她表示近日非常緊張：「有好多濕碎嘢搞，又不停超支，每晚只係瞓得兩、三個鐘，壓力大到甩頭髮，仲肥咗幾磅添！（Wilson點安慰你？）可能佢搞慣大騷，心情冇乜嘢，佢叫我唔好諗咁多，同埋有參與多啲，佢都開始緊張！」她透露豪花七位數搞婚禮，希望一生人一次的盛事可盡善盡美，問到閱女無數的Wilson可有管束其婚紗性感尺度？Calinda笑說：「佢冇管喎！話靚就得，不過我都唔會太性感啦！」

王陽明12月結婚

此外，台灣藝人王陽明昨日亦在微博公布與女友蔡詩芸的婚訊，他透露將於12月27日在澳洲悉尼舉行婚禮，而喜帖上印有一對男女及鯨鯊，相當特別！兩人分手八年後重燃愛火，並火速成婚，不少網友都感到驚喜。