張繼聰、林夏薇與楊明等前晚相約飯局欣賞主演的無綫劇集《收規華》首播，阿聰自爆劇中有偷窺楊怡出浴的戲份，齋睇膊頭仍激讚：「好正！」

張繼聰變咗「偷窺華」睇楊怡出浴，睇佢個樣幾回味！

楊怡嘅玉背咁白滑，連張繼聰都讚Like！

張繼聰於低溫下拍淋雨戲，凍到屁股抽筋。

鄭敬基（左起）、張繼聰、林夏薇與楊明約飯局睇首播。

無綫劇集《收規華》一班演員前晚約飯局睇首播，張繼聰揚言要請客慰勞共患難的同事，又提到拍攝《收》劇時搏到盡，令頸部遭殃：「有一幕成個酒埕爆落我個頭，拍咗兩Take，武指第一Take話要搵硬啲（道具），我叫佢大力啲唔使錫住我，結果爆嗰吓條頸（發出）『哼』一聲！仲有拍淋雨戲得6、7度凍到震，震到屁股抽筋！」阿聰還自爆於劇中偷窺楊怡出浴：「好正！佢偷咗我個心！不過其實分開拍，我淨係睇到佢膊頭。」

林夏薇有老公撐

至於剛成人妻的林夏薇笑言已習慣被喚作「莫太」，問到可有叫老公捧場？她說：「佢梗係要睇！屋企人都會睇。（老公讚你演技？）佢唔會咁直接，含蓄咁支持。」薇薇還透露稍後到新加坡為無綫宣傳，問到老公會否同行？她說：「唔會！大家做嘢好獨立。（冇時間造人﹖）忙完工作先！」另一主角楊明被拍得與低胸索女夜蒲，被指疑似酒後駕駛及違反禁煙條例，他統統否認：「佢係我師妹，只係傾偈飲嘢，唔係嗰回事！我當時亦冇飲酒，同埋喺指定範圍吸煙，冇違規。」

首播收視25點

此外，《收》劇與另一首播劇《陪著你走》分別錄得25點及26點收視，而洪永城到北韓拍攝的節目《在那遙遠的地方》首播亦高開25點，成績僅次於《四個小生去旅行》。

文：影視組