「新咪神」張秀文昨日穿小背心拋胸晒三吋事業線出席活動，同場的翟威廉亦擰歪面不敢直視。張秀文自爆二人曾一起浸溫泉，但對方竟「眼尾都冇望過」皆因對方掛住「搶鏡」。

張秀文投入坐在彈彈波上玩遊戲。

張秀文笑指經常遭翟威廉借過橋來刺激另一半，以增進感情。

笑言被嫌「小兒科」的張秀文，撩小朋友玩。

張秀文指因同場的小朋友太可愛，令她忍不住湊近傾偈。

公開戀情後的岑杏賢，玩呼拉圈時笑到見牙唔見眼。

擁34D上圍的「新咪神」張秀文，昨日與翟威廉、岑杏賢及湯洛雯等到馬場出席活動，與小朋友玩遊戲，身穿低胸小背心加熱褲的張秀文，俯身照顧小朋友時不經意拋出三吋事業線，又賣力地玩「彈彈波」，波濤洶湧。當她瞓身做Sit-up時，為其壓腿的翟威廉也擰歪面不敢直視。

「佢眼尾都冇望我」

對於性感打扮搶盡「峰」頭，張秀文笑說：「裏面着運動Top，等佢可以活動啲。（好有睇頭！）可能見到小朋友太開心。」同場的翟威廉被笑指不敢直望時，只尷尬地說：「我都望唔到。」而張秀文隨即自爆早前二人到日本拍節目曾一起浸溫泉：「我包住毛巾，佢眼尾都冇望過我，因為佢一心諗住點樣露多啲。」翟威廉即說：「邊得閒望佢？我都要有線條。（唔可以畀佢搶鏡？）梗係！」問到誰的上圍較厲害？張秀文搞笑地說：「吋數佢勁好多，起碼大我十吋，係形狀唔同啫！」翟威廉則自嘲「Cup數低」，並讚對方健康又Sporty，問到是否喜歡Sporty類型？與陳庭欣戀情日漸浮面的他笑說：「啱（口架）！（唔怕扭耳仔？）係喎，咁唔啱喇！」

岑杏賢結婚仲要等

另外，與藝員袁偉豪公開戀情的前港姐岑杏賢，否認訂婚及結婚傳聞，但直認雙方視為結婚對象：「兩個都係認真唔係玩玩吓。（計劃結婚？）從來冇，大家事業為先，如果結婚，佢叫我等多幾年。」她指已見家長，但家人未有催婚：「父母鍾意佢，覺得佢幾好、踏實，希望佢事業更努力。」提到出街不敢拖手，她說：「已經習慣，冇介意過。」

文：影視組