梁雨恩鏢準實力型

歌手梁雨恩（Cathy）除了唱功了得外，原來還擅於掟飛鏢，她不但代表香港出戰新加坡、上海和韓國等地舉辦的世界賽事，更榮獲2015年「Hong Kong Tour Hong Kong Ladies 8 」年度總排名第二名、2014年本地聯賽「SUPER LEAGUE SEASON 8 （Premier Division）」 冠軍及「MVP、全國飛鏢錦標賽暨武漢飛鏢嘉年華–香港區選拔賽」女子組冠軍等殊榮，實力毋庸置疑。

分享掟鏢秘技

現在就由Cathy教大家一些「掟鏢」要注意的事項。首先，參賽者必須站於投擲線後，不能踩界，Cathy說：「身體微微向前傾，重心放前啲，可以拉近個人同鏢靶嘅距離。同埋重心腳最好同投擲線成45度角，咁樣就算玩好長時間，膝頭都冇咁攰。」

而掟鏢的姿勢亦相當講究，手放在眼的前方，方便瞄準，而手腕與手臂則成90度角。不少女生均遇上飛鏢插不住鏢靶的問題，故時常用蠻力掟鏢，對此，Cathy說：「唔好用蠻力，手臂要定住，淨係用擺動手腕嘅力量，放支鏢出去，咁樣飛出嚟嘅鏢就最穩定。你可以想像放緊紙飛機咁，放出去之後，手臂同手腕成一直線。」她建議大家不斷重複練習三個動作，Set Up（手放在眼前，手腕與手臂成90度）、Take Back（拉後手腕）及Release（向前掟出飛鏢，手臂與手腕成一直線），把基本功練好。

非只酒吧玩意

Cathy又建議若使用右手掟鏢的話，應用左手把飛鏢從鏢靶上取回，她說：「一嚟右手唔使郁咁多冇咁攰，又可以保持住肌肉嘅記憶，同埋有時鏢頭會斷咗插住喺鏢靶上面，可能會整損隻手，所以用唔掟鏢嗰隻手嚟拎會好啲。」她大讚飛鏢活動老少咸宜，而且男女亦能一同玩樂，她說：「飛鏢唔似球類運動咁講求體力，男女都可以公平競賽。而且飛鏢一個人玩又得，一大班人玩又得，真係好好。」提到不少人對「掟鏢」有偏見，認為只是年輕人到酒吧消遣的玩意，Cathy力撐「掟鏢」百分百有益身心，更能提升心理質素：「我從來唔會飲酒掟鏢，不過比賽嗰陣真係有好大心理壓力，要學識平衡壓力，先可以做出最好成績。」

專屬飛鏢

Cathy透露飛鏢分為四部分：鏢翼、鏢桿、鏢心及鏢頭，選手可根據喜好更換不同零件。Cathy擁有專屬鏢翼，上面除了有羽毛圖案，更寫着「Rain of Grace」，代表她的名字「雨恩」。顏色方面則採用她最愛的透明、粉紫及粉紅，完全度身訂造。

威水黑卡

每位飛鏢運動員均有用來記錄分數的「飛鏢卡」，不但方便用家查看成績、個人最高分數紀錄、平均分數等，更能透過飛鏢機與各地鏢手即場隔空比試。而曾出戰世界賽的Cathy，更擁有一張寫着「The World 2015」的黑色飛鏢卡，她說：「呢張係The World世界賽專用嘅，一年會換一張，記錄低嗰年比賽嘅分數。」

文：名人組

攝：張福宏

場地：fill darts

髮型：Jacky @ IL COLPO Platinum

服裝：Amenpapa